Asturies rexistra 6.393 paraos menos que va un añu

L'afiliación a la Seguridá Social xube en 6. 576 persones al respective del añu pasáu. La cifra de demandantes de trabayu, que s'asitia en 76. 071, ye la más baxa nun mes de setiembre dende’l 2010.

Asturies contabilizó en septiembre 6.393 paraos menos qu'un añu antes y encadena yá 48 meses de descensos interanuales nes cifres de paraos. Esta baxada, del 7,75 % en términos porcentuales, afecta a tolos grupos d'edá, magar ye más significativa ente los homes menores de 45 años. Por sectores, ye especialmente relevante na industria y la construcción, qu'algamen un amenorgamientu, al respective del mesmu periodu del 2016, percima del 13 %.

En total, el mes pasáu contabilizáronse 76.071 demandantes de trabayu, la cifra más baxa pa un mes de setiembre dende’l 2010, cuando se rexistraron 76.002 paraos.

La directora del Serviciu Públicu d'Empléu (Sepepa), Luisa Pérez, valoró l'enclín qu'amuesen les cifres na rexón, “que suma yá munchos meses consecutivos de descensu nel paru en términos interanuales”.

No que fai al mes d'agostu, Asturies sumó 3.401 paraos, lo que supón un aumentu del 4,68 %. Esi ascensu nótase en dambos sexos, en tolos grupos d'edá, sobre manera ente los menores de 25 años (12,34 %), y prácticamente en tolos sectores, cola escepción única de la construcción. “Hai que destacar que mientres el mes pasáu aumentaron tamién los demandantes de primer empléu”, esplicó Pérez.

Los datos conocíos güei reflexen qu'Asturies cunta con 360.142 persones afiliaes a la Seguridá Social, 6.273 menos que n'agostu, lo que supón un descensu del 1,71 %. En términos interanuales, sicasí, caltiénse l'enclín positivu, con una medría de 6.576 persones, un 1,86 % más que nel mesmu períodu del 2016.

A nivel estatal, les afiliaciones aumentaron nel últimu mes un 0,14 %, un porcentaxe que xube hasta'l 3,52 % en comparanza con setiembre del 2016.

Los datos d'Asturies manifiesten una evolución similar a la del conxuntu del estáu, onde'l paru rexistráu mengua un 8,34 % en términos interanuales y crez en 27.858 persones, un 0,82 % al respective d’agostu.

La medría de paraos n'Asturies en setiembre concéntrase, fundamentalmente, n'actividaes rellacionaes col metal y el sector servicios. En concreto, nel comerciu, la hostelería, l'Alministración pública y actividaes sanitaries y de servicios sociales.

Por conceyos, les tases de variación más elevaes rexistráronse nos más turísticos, tanto nel oriente como nel occidente, como Cangues d'Onís, Ribeseya, Ribedeva, Llanes, Parres, Colunga, Valdés y Tapia.

Les cifres muestren que la campaña de branu enllargóse n'Asturies y provoca medríes del paru rexistráu nel mes de setiembre percima de la media del conxuntu del país. Ye menester destacar tamién que nesti mes tradicionalmente munchos mozos inscríbense nes oficines d'empléu en busca del so primer trabayu.