Asturies rexistra’l crecimientu menor del PIB ente'l 2000 y el 2009

Asturies foi la comunidá que tuvo un crecimientu menor de la tasa media del Productu Interior Brutu (PIB) ente los años 2000 y 2009 al rexistrar una xuba del 1,69 por cientu, según los datos daos a conocer güei pola Fundación de Caxes d’Aforros (Funcas). La media estatal ye del 2,21 por cientu.
 
Les Illes Balears, con una xuba del 1,86 por cientu, ye l’otru territoriu que presenta un crecimientu menor del PIB, mentes, que nos primeros puestos de la llista alcuéntrense Murcia, que rexistró un 2,83 por cientu, y Madrid, con un 2,51 por cientu. Dende Funcas aseguren qu’estos comportamientos desiguales débense a la inmigración.
 
No que respecta al añu 2009, la medra d’esti indicador económicu foi negativa en tol conxuntu del Estáu. N’Asturies, el PIB descendió un 3,84 por cientu, cifra cercana a a la media estatal (-3,68 por cientu), situándose Aragón nesti casu como la comunidá con un rexistru peor al descender un 4,66 por cientu. Por contra, Extremadura ye’l territoriu con una baxada menor del PIB según los datos de Funcas, con un -2,05 por cientu.