Asturies refuga abrir la movilidá con Galicia y Cantabria en “defensa de la salú pública”

La movilidá per tolos territorios bañaos pol Cantábricu nun se va facer efeutiva hasta’l 21 de xunu, cuando ta previsto’l fin del estáu d’alarma. El Gobiernu refugó esti xueves, en “defensa de la salú pública”, permitir el tránsitu de persones con Cantabria –que previamente tomara la mesma decisión– y Galicia dende esti llunes.

La vocera del Executivu, Melania Álvarez García, recordó qu’Asturies “pretendió siempre que’l pasu d’una fase a otra fora en tou momentu segura pa toes y toos”, dando prioridá al “criteriu epidemiolóxicu y sanitariu”. Asina, confirmó que’l país va “escosar l’estáu d’alarma” y “caltener la llende de movilidá con Galicia y Cantabria”.

La conseyera de Derechos Sociales y Bienestar reconoció la intención inicial de solicitar al Gobiernu estatal dicha apertura colos dos territorios, con conversaciones d’Adrián Barbón colos presidentes de les dos autonomíes, asina como cola de Navarra. Valoróse, poro, un corredor del norte hasta Aragón, al tar toes estes comunidaes en fase 3, pero “los biltos del País Vasco fixeron estremar les precaciones”.

Asina, Cantabria refugó güei mesmo abrir la movidilidá al igual que Navarra –Aragón siguirá’l mesmu camín–, quedando p’Asturies namái la opción de Galicia, “partidariu de llevantar esti estáu d’alarma, lo que trai un problema”, esplica Álvarez García. Dada la situación, y en “defensa de la salú pública”, el Conseyu de Gobiernu tamién tomó la decisión de nun solicitar l’apertura del tránsitu “coles comunidaes fronterices”.