Asturies recibió hasta xunetu 1.177.784 turistes

Los agospios asturianos acoyeron a 1.177.784 turistes que xeneraron 2.645.847 pernoctaciones nos siete primeros meses del añu, según los datos publicaos güei pol Institutu Nacional d'Estadística relativos a xunetu.

Estes cifres acumulaes suponen la segunda meyor marca de la serie histórica, per detrás de 2017, que foi añu récord con un 4,4% más de turistes y un 6,1% más en pernoctaciones.

El turismu internacional caltiense al alza mientres esti periodu, con una medra del 3,4% nel númberu de viaxeros, que yá algamen los 209.261.

En xunetu, toles tipoloxíes d'agospiu perdieron turistes y pernoctaciones con respectu al mesmu mes del añu anterior, perxudicaes poles males condiciones meteorolóxiques. Nel cómputu global, Asturies esperimentó una cayida media del 8,6% en turistes y del 10,1% en pernoctaciones, motivada en gran parte polos datos de campings y apartamentos, que perdieron un 19,5% y un 21,3% en turistes, respectivamente, al respective de xunetu de 2017.

Los turistes qu'escoyeron un hotel para les sos vacaciones n'Asturies menguaron un 4,9%, y un 10% los qu'optaron por agospiamientos de turismu rural, a pesar de caltenese como'l destín preferíu de la 'España Verde' en xunetu, y terceru a nivel estatal tres Baleares y Castiella y Llión.