Asturies recibe miles de visitantes nuna Selmana Santa con agua, sol y propuestes de toa triba

La ocupación hotelera ta cerca del máximo a les puertes de los cuatro díes nos que se concentren les festividaes de Selmana Santa, que comenzarán con agua y finarán con sol. Son munches les actividaes, tanto relixoses como llúdiques, previstes estos díes, como’l Primer Sidre l’Añu o’l Certame de la Marañuela.

El mal tiempu va centrase na xornada de mañana, con lluvia sobre manera pela tarde que podría convertise en tormentes con bastiazos nel interior. La inestabilidá siguirá na mañana del vienres, pero pela tarde saldrá’l sol, que nos acompañará’l restu de la Selmana Santa.

Son munchos los visitantes qu’aprovechen estos díes festivos pa visitar Asturies y disfrutar de les munches opciones esistentes. No relixoso, Villaviciosa, Ḷḷuarca, Xixón, Avilés, Vilanova, Uviéu, L'Infiestu, Llanes o Cangues d'Onís concentren la mayor parte d’elles, mentes que’l restu del país tamién atopa eventos d’ociu o xornaes gastronómiques.

La mayor espicha d’Asturies

En Xixón destaca la celebración del Primer Sidre l’Añu, que cumple diez ediciones. La zona del tendayu del Muséu del Pueblu d’Asturies conviértese nuna gran espicha na que poder prebar la sidre nuevo, ensin trasegar, de más de 70 llagares abonando una entrada de 6 euros.

La revista 'La Sidra' y la Fundación Asturies XXI son los entamadores d’esti eventu que pretende recuperar la tradición de les espiches pa cuando Selmana Santa. La sidra oficial será Prado y Pedregal del Llagar La Morena, ganadora del concurso La Meyor Primer Sidre L'Añu 2019 celebráu’l sábadu.

La inauguración va ser mañana, a les 13 hores, cola llectura del pregón pol historiador Luis Benito García, impulsor de la candidatura de la Cultura Sidrera Asturiana pal su reconocimiento como patrimoniu cultural inmaterial pola UNESCO. L’horariu d’apertura del Primer Sidre l’Añu ye de 13 a 22 hores, mañana; de 12 a 22 hores, el vienres y el sábadu; y de 12 a 17 hores, el domingu, cuatro xornaes na que los asistentes tamién van atopar exhibiciones, talleres, prebes guiaes, cocina en direuto, música y baille del país, deportes tradicionales, artesanía y activadaes pa la reciella.

Güevos Pintos, El Bollu y más

Asturianes, asturianos y visitantes tamién van disfrutar d’otres munches propuestes estos díes, como la Fiesta de los Güevos Pintos, en La Pola Siero, anque la so cita central ye’l martes; les Fiestes d’El Bollu, n’Avilés, destacando la Xinta na Cai del llunes; el XXXII Certame de la Marañuela, en Lluanco; les XXXIII Xornaes Gastronómica del Pixín, en Muros; la IV Fiesta de los Tortos, en Meré; la Fiesta del Pescador, en Cuideiru; o l’Expo Surf, en Ḷḷuarca, ente otros munchos.

Na semeya, un momentu del Primer Sidre l'Añu la edición pasada.