Asturies, que yá supera les 100.000 PCR, ye la segunda comunidá autónoma que más pruebes fai

Con una tasa de 99,7 PCR por cada 1.000 habitantes, Asturies ye la segunda comunidá autónoma que más pruebes d’esti calter –la más fiable y la única que se contabiliza– fai depués de La Rioja, siendo la media estatal de 59,9. El país entró esti llunes a la fase 3 del procesu de desescalada, na que va siguir hasta’l día 21 por prudencia.

Esti xueves, Asturies llevara procesaes 101.726 muestres por PCR –ayeri yá ascendía a 105.011, según los datos del Ministeriu de Sanidá a partir de los que recibe de les comunidaes. Esto significa que la tasa de PCR por cada 1.000 habitantes ye de 99,7, cifra namái superada por La Rioja, que presenta 107,2.

El nuesu país pasa asina na llista a Euskadi, que rexistra 97,3. Dende que'l ministeriu vien espublizando de manera selmanal estos datos, estos trés territorios vienen confirmándose como los que faen más PCR, les pruebes más fiables pa descubrir portadores al deteutar l’ARN del coronavirus SARS-CoV-2.

Andalucía, una comunidá mui poco afeutada pola pandemia de COVID-19, ye la que menor tasa presenta, con 24,6 por cada 100.000 habitantes, mentes que la ciudá autónoma de Ceuta presenta 22,5. La media estatal ye de 59,9.

Na semeya, Llaboratoriu de Microbioloxía del HUCA, onde se procesen les muestres pa la determinación de la COVID-19 por PCR.