“Asturies ye la punta de llanza d’hasta ónde se pue llegar con Podemos”, afirma Fernández

|

4.000 persones inscribiéronse hasta la fecha n'Asturies pa participar na ‘Asamblea Ciudada Sí se Pue’ de Podemos, na que ta trabayando un equipu téunicu de 26 persones, ente ellos trés asturianos: Daniel Fernández, Daniel Ripa y la eurodiputada Tania González. “Asturies ye la punta de llanza d’hasta ónde se pue llegar con Podemos”, afirma’l voceru de Compromisu.

Los resultaos eleutorales nes Europees, convirtiéndose na tercer fuercia más votada nel país, y “la respuesta brutal que tamos teniendo” de cara a l’asamblea prevista na segunda quincena d’ochobre, sitúen a Asturies como ún de los referentes a nivel estatal de Podemos. “Nes Primaries yá presentamos una candidatura asturiana con cinco candidatos, situándose dalgunos d’ellos na parte alta de la llista, como Tania qu’inclusive algamó al final escañu, y ta viéndose anguaño que tenemos un pesu importante en Podemos y un papel activu na política asturiana pese a nun contar con representación”, apunta Fernández, que recuerda les reaiciones del PSOE y el PP a dellos asuntos plantegaos recién pola organización ciudadana, como asocedió cola denuncia sobre’l gastu que suponen los espectáculos taurinos. Ye por ello que’l xixonés entiende que “Asturies ye la punta de llanza d’hasta ónde se pue llegar con Podemos”, con munches espectatives puestes na ‘Asamblea Ciudadana Sí se Pue’ y nes cites eleutorales próximes.

A nivel estatal, el númberu d’inscripciones dende que s’anició’l procesu ronda les 105.000, una cifra más que considerable que siguirá aumentando nos díes próximos. Mentes, l’equipu téunicu dirixíu por Pablo Iglesias y coordináu por Luis Alegre, nel que participen Fernández, Ripa y González, ta na fase de la ellaboración de los preborradores, pasu previu a poner en marcha’l procesu asambleariu. Asina, dichu equipu encargó la ellaboración de los trés preborradores –organizativu, políticu y éticu– a trés persones esternes al mesmu, al tiempu que fai una función de coordinación y esplicación del procesu a los diferentes círculos. Estos preborradores pueden ser discutíos polos ciudadanos hasta’l 15 de setiembre, fecha na que va abrise’l procesu de consulta, nel que per un mes los círculos van poder proponer borradores a partir de los preborradores establecíos. Finalmente, a partir del 15 d’ochobre, va ser posible presentar enmiendes a los borradores definitivos que van tratase na asamblea –ensin fecha tovía establecida–. D’ésta saldrán delles resoluciones que van votase per Internet y, una vegada establecíos los muérganos de decisión, entamaráse una votación nueva ente toles candidatures presentaes a los mesmos. Un procesu llargu pa establecer los cimientos del partíu col que Podemos pretender amosar tresparencia y contar cola mayor participación ciudadana.

El papel de Compromisu

Entrugáu sobre’l papel que ta xugando Compromisu por Asturies en Podemos, Fernández apunta que la organización sigue trabayando de manera autónoma, considerando a Podemos como “una ferramienta pa plasmar en gran midida dalgunes reivindicaciones del asturianismu”. “Ensin poder compartir tolos principios y pese a los marcos diferentes nos que trabayamos, tamos desmostrando que se pue collaborar nesti momentu importante de cambiu políticu”, añade’l voceru de la federación de partíos y independientes, que ve a Podemos como una oportunidá a la que tamién se pue sumar nun futuru otres formaciones como Equo, ensin descartar averamientos con CUP o EH Bildu.

Contador Estadistiques