Asturies protestó contra la marea prieta

La tercer marea prieta sigue llegando a la costa gallega nun día en que naide va trabayar ellí porque tan aguardando a que se llegue a un alcuerdu con Salvamentu Marítimu que garantice les mesmes condiciones pa tolos que trabayen na retirada del galipote. Güei ye tamién el día en que la nueva coordinadora presidida por Corina Porro, Conseyera d'Asuntos Sociales y candidata del PP por Vigo, tien d'asumir el llabor depués de que la Xunta prescindiere ayeri de Tragsa. Otramiente en Galicia, la rocea con Tragsa y l'alministración llevó estos dos díes a manifestaciones qu'acabaron con cargues policiales y fuelgues de fame y toa triba de manifestaciones de xente malcontento. L'exércitu tampoco nun quedó al marxe de la protesta, prendiendo fueu anteayeri un camión militar. (Más información nel especial de Vieiros)

N'Asturies la cosa ta más tranquila, y nin la concentración del llunes n'Avilés en presencia del Ministru Álvarez Cascos nin la d'ayeri en Xixón (na semeya) acabaron en violencia. Mientres la marea negra nun s'engafienta pel momentu coles playes del país como va dos selmanes, la situación ta nuna tensa tranquilidá a la espera d'acontecimientos. Anque'l Principáu aporta un mensaxe de tranquilidá, particulares y voluntarios dan anuncia de que siguen pasando manches de galipote énte la costa asturiana. Ente les más grandes que s'acolumbraron güei, dase anuncia d'una pergrande enfrente de Lluanco con una consistencia de cerca de 15 cmts de gordo, y ye que tola parte del Cabu Peñes ye de les que más añu tan llevando. Precisamente'l Principáu diz que les playes d'Arteu, Oleiros y San Pedro en Cuideiru, Molín del Puirtu en Gozón, y Munielles en Castrillón son les que más galipote presentaben esta mañana. Fontes de la Universidá d'Uviéu confirmaron que la fastera occidental del Cabu Peñes ye de lo que más ta dañando'l galipote, y anunciaron que, ente la falta d'instrumentos d'evaluación por parte del Principáu y demás alministraciones que garanticen la calidá del mediu ambiente, van salir la selmana qu'entra a facer trabayu de campu con un barcu pa tomar muestres y ver hasta que puntu ta llegando la contaminación, lo mesmo n'organismos vivos que nel agua o lo que pueda tar posando en fondu la mar, yá que nun hai datos oficiales d'ello. Los biólogos de la Universidá dicen que l'impactu del galipote nel mediu abúlta-yos tien de ser pequenu, pero eso namás ye un suponer que ye imprescindible confirmar.