Asturies protagoniza unes xornaes gastronómiques d'El Corte Inglés

El Gobiernu ta detrás d'esta iniciativa que cuenta col sofitu del Club de Guisanderas.

Les xornaes gastronómiques 'Asturias Paraíso Natural' van celebrase en tolos restoranes de la cadena ente güei y el 23 d'ochobre n'España y Portugal, sacante en Canarias, onde van tener llugar una selmana más tarde. El Club de Guisanderas collabora con delles de les sos meyores recetes, amás de nel diseñu de la carta que va amosar a los veceros lo meyor de la gastronomía asturiana. Al empar, promociónase'l país como destín turísticu.

Na presentación d'esta iniciativa, que tuvo llugar nel restorán d'El Corte Inglés de Serrano, en Madrid, participaron el direutor xeneral de Comerciu y Turismu, Julio González Zapico; el direutor de Restauración d'El Corte Inglés, Guillermo Arcenegui; la presidenta del Club de Guisanderas, Amada Álvarez Pico; y el direutor de Comunicación y Promoción de Viajes El Corte Inglés, Fernando Tomás.