Asturies, protagonista en medios internacionales

|
Artículu de 'The Telegraph' Asturies

L'americana CNN y los europeos BBC Alba y 'The Telegraph' dediquen espacios al país.

Asturies ta siendo nos díes últimos protagonista d'espacios en medios internacionales d'audiencies millonaries. 'Parts unknow' –que pue tornase como zones o lugares desconocíos–, documental dirixíu por Anthony Bourdain, cocineru mui popular n'Estaos Xuníos que se suicidó poco depués de rodar nel país, dedicó un episodiu a Asturies que s'emitió'l domingu na CNN nel nomáu 'prime time' o tiempu d'audicencia máxima que, sicasí, nun-y dio tiempu a editar dafechu.

Bourdain, con José Andrés como guía, cocineru asturianu de munchu ésitu al otru llau del charcu, percorrió dellos puntos d'Asturies pa conocer la so gastronomía y dalgunes costumes, como la cuatriada. Xixón, Bulnes, Avilés o Cangues d'Onís foron dalgunos de los llugares nos que se rodó l'episodiu.

Otru documental sobre Asturies pudo vese n'Escocia, na canal BBC Alba qu'emite en gaélicu escocés, enfocáu al tema musical. Trátase de 'Port', que nesta temporada da'l saltu dende les isles y viaxa per Asturies, Galicia y Breizh.

Músicos como Xosé Antón Fernández 'Ambás', Rubén Alba, Chus Pedro, José Manuel Tejedor o Javier Tejedor actúen xunto con Julie Fowlis and Muireann NicAmhlaoibh, artistes bien conocíes na escena celta que tamién s'averen a la gastronomía asturiana con una visita a Nacho y Esther Manzano. La previsión ye qu'esta temporada de 'Port' pueda emitise íntegra esti añu en TPA, anque pue vese yá na web de BBC Alba na so versión orixinal (con IP británica).

Prensa escrita

Más al sur, n'Inglaterra, Asturies ocupa páxines na prensa escrita. En concreto nel periódicu londinense 'The Telegraph' na so estaya de viaxes.

"Experiencie the dramatic landscapes and cultural heritage of Asturies" –esto ye, "esperimenta los espectaculares paisaxes y la herencia cultural d'Asturies– reza'l títular del artículu. El mesmu compara'l nuesu país con Cymru, califica'l nuesu pescao "de primera" y los nuesos quesos como "los meyores d'España", y cita llugares como Cuadonga, Uviéu, Somiedu, Xixón o Avilés.

 

 

Contador Estadistiques