Asturies promocionóse nuna feria en Seúl

El país acudió per primer vegada a la Korea World Travel Fair (KOTFA) pa dar a conocer les sos rutes venceyaes al Camín de Santiago.

Asturies tuvo presente na feria de viaxes más importante de Corea del Sur, que celebró la so trentena cuarta edición dende'l xueves hasta ayeri en Seúl. El Gobiernu instaló un espaciu personalizáu dientru del puestu de Turespaña, encargáu de promocionar l'Estáu como destín turísticu n'Asia.

Los atractivos principales qu’Asturies promociona pa esti mercáu ye’l so paisaxe y la so ñatura, amás de les sos rutes venceyaes al Camín de Santiago. Amás, y pola mor del interés d’estos viaxeros pola gastronomía y les cocines nueves, la ufierta culinaria del país ye otru de los aspectos que s’amuesen nesta feria na que participen alredor de 70 estaos y que nes 2018 tuvo 70.000 visitantes.

Los destinos principales pa los surcoreanos nel Estáu son Barcelona, Mallorca y, nos años últimos, el Camín de Santiago, d'ehí l'interés del Gobiernu de promocionase nesti país, tercer emisor de turistes a España del continente asiáticu, con 441.826 visitantes nel 2017, per detrás de China (513.725) y Xapón (442.132). La so temporada favorita pa viaxar ye d’ochobre a febreru, polo que la so llegada ayuda la desestacionalización del sector.