Asturies, presente na Capital Europea de la Cultura

El domingu 5 d'agostu entamaron les actividaes de la Selmana d´Asturies en Leeuwarden (Paises Baxos), Capital Europea de la Cultura 2018.

Del 5 al 12 d'agostu van desendolcase delles actividaes y esposiciones nel Pabellón de les Llingues minoritaries de la ciudá de Leeuwarden, organizao pola Fundación AFÙK, responsable del proyeutu 'les llingues', que contaron col sofitu nesta estaya d'Iria Rodriguez y Carlos Díaz (Flavia y Verval), componentes del grupu musical Xera.

 

Nel stand podrán vese esposiciones sobre mitoloxía asturiana del dibuxante y etnógrafu Alberto Álvarez Peña de la Fundación Belenos, y una muestra de traxes tadicionales asturianos cediós pola banda de gaites 'La Raitana'.  Tamién tará presente la música con una amuesa de produciones musicales  ufiertaos por Musicasturiana.com.  La Oficina de Turismu  y  la  Dirección Xeneral de Planificación Llingüística del Principáu d´Asturies,  aportaron material turísticu y una esbilla de llibros n'asturianu pa completar la esposición.

 

El programa d'actos entamó'l domingu 5 con un conciertu al que s´amestó la poesía de la poetisa eslovena Kristina Kòcan. 

 

El miércoles 8,  Roberto Alvarez-Sirgo Díaz, en representación de l'asociación Iniciativa pol Asturianu, falará sobre la llingua asturiana y sobre los pasos na so normalización nos caberos tres sieglos.

 

El Xueves 9, el grupu Xera-Raíz, ufiertará un conciertu acompagáu pola poetisa frisona Gear Tigchelaar, xunto col proyeutu artisticu xuvenil de 'Frysk Ynternasjonaal Kontakt' (FYK).

 

El vienres 10 y el sábadu 11, dedicaránse a asoleyar aquelles señes d´identidá asturianes como ye la vestimenta y la gastronomía.

 

El domingo 12 va echase'll pieslle a esta Selmana Cultural d´Asturies y daráse entamu la selmana dedicada a la llingua friulina(Italia). Xera-Raíz, fadrá otru conciertu acompagau pel artista de Hip Hop Friulianu, DJ Tubet.