Asturies prepara un 8 de setiembre de folixa y reivindicación ensin restricciones

|
Cartelos Día d'Asturies

Llueu de dos años col 8 de setiembre marcáu poles restricciones, el país torna a vivir un Día d'Asturies como los previos a la pandemia, con sitiu pa la folixa y pa la reivindicación. Corvera acueye los festexos del Gobiernu, Podemos celebra nel Pueblu d’Asturies con conciertos de Felpeyu y Calea y delles organizaciones concéntrense frente a la Xunta Xeneral baxo’l lema ‘¡Otra Asturies ye posible!’.

Andecha Astur, Corriente Sindical d’Izquierda (CSI), Unión de Juventudes Comunistas de España (UJCE), Juventud Comunista de España (m-l) y Federación Asturiana Memoria y Repúbica (FAMYR) convoquen esta “movilización xunitaria na que se prioriza la convocatoria conxunta de les organizaciones perriba de la identidá de cauna d’elles” al meudía a la puerta del Parllamentu asturianu. “El cartelu apaez ensin firma pa que naide nun puea sentise escluyíu de la convocatoria, y col enfotu d’avanzar nun frente común asturianu y d’izquierda que permita ufrir al pueblu asturianu una alternativa viable y tresformadora socialmente, precisamente p’avanzar nuna Asturies onde les asturianes y asturianos puedan vivir con dignidá, siendo dueños y protagonistes del so destín en llibertá y democracia”, apunten dende la formación nacionalista.

Podemos, pela so parte, recupera la so fiesta nel Muséu del Pueblu d’Asturies baxo’l nome de ‘La Folixa’. A lo llargo de tol día va haber charres y intervenciones cola presencia de Faustino Zapico (IAS), Oskar Matute (EH Bildu), José Manuel Zapico (CC OO), Marga Ferré (IX), Isa Serra (Podemos Madrid) y Joan Mena (En Comú Podem), ente otros.

Va haber puestu pa comida y bébora, xuegos tradicionales, y van entamase actuaciones de música tradicional del país. Asina, va tocar Felpeyu a les 14 hores y el tríu Calea, formáu por Leticia Baselgas, Sivia Quesada y Rubén Bada, a les 17.30.

Izquierda Xunida (IX), pela so parte, nun organiza’l tradicional actu pol Día d’Asturies que sirve d’arranque al cursu políticu mañana, sinón que lu tresllada al sábadu. Va tener llugar en Grau a partir de les 11 hores, col actu políticu previstu pa les 13 hores cola presencia tamién de Faustino Zapico y José Manuel Zapico; Henar Moreno, vicepresidente del Parllamentu de La Rioja y miembru de la Direición Federal d’Izquierda Unida; y Ovidio Zapico, coordinador xeneral d’IX.

Conciertu de Los Berrones

Tamién la música va tener un protagonismu importante na celebración pol Día d’Asturies qu’entama’l Gobiernu, qu’esti añu van tener llugar en Corvera. Más de 30 actividaes van desendolcase per tol conceyu a lo llargo del día con una docena de grupos folclóricos y conciertos como’l d’Algaire (13.30 hores, Cancienes), Argayu (17.30 hores, Les Vegues), Anabel Santiago y les Pandereteres de Fitoria (18 hores, Cancienes), Chus Pedro y Pipo Prendes (19.30 hores, Les Vegues) o Los Berrones (22.30 hores, prau de la fiesta en Les Vegues).

Otra manera, de tarde, nel Auditoriu d’Uviéu a partir de les 18.30 hores, van entregase les Medayes d’Asturies. La celebración relixosa, mentes, tien llugar pela mañana, al meudía, en Cuadonga.

Contador Estadistiques