Asturies por un Aire Sano diz que l’aplicación asturAire nun ye oxetiva

La selmana pasada’l Gobiernu presentó l’aplicación pa dispositivos móviles asturAire, que permite conocer los datos rexistraos d'hasta un total de seis contaminantes. Asturies por un Aire Sano señala qu’ésta nun ye oxetiva al nun incluyir la mayor parte d’estaciones.

“L’app danos el promediu de contaminación cada 24 hores pero sólo de dalgunes estaciones, quedando fuera la mayoría d’elles, que son d’organismos (puertos d’El Musel y d’Avilés), conceyos (Xixón) y empreses, con datos que deben ser públicos”, asegura. Asina, apunta que “hai munchos conceyos asturianos que nun tienen nenguna estación publica de control y sí de otros organismos”, polo que, “a pesar de la evidente contaminación que sufren, n’asturAire nun se sabe lo que-yos asocede”, como ye’l casu de Corvera, Carreño, Gozón, Navia, Llanera y Morcín.

Como recomendación, plantega que l’aplicación “s’actualice per hores”. Tamién que tenga la opción “de ver los valores de díes anteriores, pa poder facer un bon estudiu de la calidá del aire”.

Asturies por un Aire Sano fai d’igual forma referencia al protocolu de contaminación que citó’l viceconseyeru de Mediu Ambiente nel actu de presentación d’asturAire, Benigno Fernández Fano, “que nun tienen en cuenta los picos de contaminación”. D’igual forma amosó la so indignación poles sos pallabres, al calificar de “mui bona” la calidá del aire del país, “comparándonos con otres zones d’Europa o ciudaes como Madrid y Barcelona colos sos propios problemes de contaminación, mui diferentes a los asturianos; mui alloñaos de los valores malos que padecemos en partícules de menos de 10 micres y de bencén d’alcuerdu a los datos oficiales que se pueden ver na calidá del aire d’España y d’Europa”.

Na semeya, nube de contaminación en Somonte.