Asturies pon normes propies a la fase 3: chigres nocherniegos y discoteques van siguir trancaos

El Gobiernu asoleyó'l decretu qu’avanzara Adrián Barbón, nel que se confirmen restricciones y flexibilizaciones con respeuto a la regulación estatal de la fase 3. Les discoteques y chigres nocherniegos van siguir trancaos y el máximu en grupos de 15 persones, mentes qu’aumenten los aforos de los bares.

Dende ayeri, cola entrada na fase 3, Asturies garra la xestión del estáu d’alarma hasta la llegada de la normalidá nueva, que va ser, como mui pronto, el día 21. Como anunciara Barbón el sábadu, el Gobiernu ellaboró un decretu que revisa delles cuestiones de la regulación estatal cola intención preservar la salú pública que s'asoleyó nel BOPA de güei.

N’Asturies les xuntes de persones nun va ser de 20 sinón que va siguir en 15, como yá dexara entrever el presidente del país. La sorpresa del decretu foi la prohibición de l’apertura de discoteques y chigres nocherniegos, que nel restu del Estáu en fase 3 pueden facelo ensin facer usu de les pistes de baille.

Los chigres diurnos sí se ven beneficiaos, yá que’l Gobiernu amplía los aforos a dos tercios de la so capacidá en llugar del 50 por cientu. Les terraces caltiénense nel 75 por cientu, anque s’encamienta a evitar que se fume nelles “pola rellación qu’esta actividá pudiera tener col incrementu del riesgu de tensmisión del virus SARS-CoV-2”.