Asturies pol Derechu a Decidir entama una xornada d'análisis

Lleva'l nome de 'Cambialo too: una mirada xurídica y social sobre'l derechu a decidir'.

Uviéu acueye mañana esta xornada qu'entama Asturies pol Derechu a Decidir, plataforma qu'axunta a delles organizaciones y coleutivos en solidaridá pueblu catalán que nos últimos años tien convocaes delles concentraciones de sofitu al procés. Nella "vamos analizar les implicaciones xurídiques y sociales de la sentencia sobre'l procés soberanista catalán y les consecuencies que dexen pa los movimientos sociales y políticos contrahexemónicos de tol Estáu español", espliquen.

La mesa redonda 'Les llibertaes civiles y les implicaciones xurídiques de la sentencia del procés' va abrir el día a les 12.30 hores nel Aula de Graos de la Facultá de Bioloxía de la Universidá d'Uviéu, cola participación de l'activista social catalana Marina Morante; Xavier Monge, abogáu nes causes poles cargues del 1-O; el cantante Nacho Vegas; y Silvia Salamanca, en representación de la organización. Yá de tarde, a les 18.30 hores nel Cibercentru de La Lila, va entamase l'alderique 'Voces solidaries col derechu a decidir: faciendo palanca pa la tresformación social', cola presencia de Morante y Monge xunto con Jaime Pastor, profesor de Ciencies Polítiques na UNED y voceru de Madrileños por el Derecho a Decidir, les trabayadores en llucha de la Plataforma SAD (Servicios d'Ayuda a Domiciliu) y Iyán González, d'Asturies pol Derechu a Decidir.

Pa pesllar va celebrase una espicha de xermandía y autoxestión dende les 20.30 hores nel Llar La Llegra. Toles actividaes son abiertes a la ciudadanía.

Na semeya, concentración convocada por Asturies pol Derechu a Decidir el pasáu 14 d'ochobre n'Uviéu tres conocese la sentencia del procés.