Asturies pierde un referente nel estudiu de la so historia

|
Asturies pierde un referente nel estudiu de la so historia

Juan Ignacio Ruiz de la Peña finaba esti martes pero dexaba a Asturies un gran legáu gracies al so trabayu nel estudiu de la historia del país. Especializáu na época medieval, ye importante sobre manera na investigación de la formación de les poles.

Caderalgu d'Historia Medieval, tuvo como maestru a Juan Uría, dando continuidá al so xeitu asturianista nos sos trabayos. Nellos, amás de les poles asturianes, tamién estudió el comerciu medieval y les pelegrinaciones, y foi autor de numberosos llibros sobre la época histórica na que s'especializó, l'Altu Medievu. Amás collaboró na redaición de la 'Gran Enciclopedia Asturiana'.

L'uviedín ocupó'l cargu de vicerrector de la Universidá d'Uviéu n'época del rectoráu d'Alberto Marcos Vallaure, el primeru eleutu de la institución asturiana nel añu 1983, y nel 2008 foi nomáu direutor del Real Instituto de Estudios Asturianos (RIDEA), entidá de la que formaba parte dende l'añu 1971 y que dirixó hasta'l 2013.

El funeral pol so alma va celebrase esta tarde, a les 17 hores, na ilesia parroquial de San Tirso el Real, pa depués ricibir sepultura cristiana nel cementeriu d'El Salvador.

Condolencies del Gobiernu

El Gobiernu emitió ayeri una nota na que llamentaba la muerte de Ruiz de la Peña y na que destacaba la trayeutoria docente y investigadora del caderalgu, con un reconocimientu internacional. "Xunió a a lo intensa actividá como profesor universitariu un gran llabor investigadora y una producción científica de calidá", destacaron dende l'Executivu.

Semeya propiedá del RIDEA.

Contador Estadistiques