Asturies pierde un carambelu

La otra selmana armose un espolín de los gordos a cuentu de l'allugamientu del domiciliu fiscal de Terra. Ello ye que la filial de Telefónica, que tenía la sé en Madrid, cambiare per Barcelona en cumplimientu de lo que manda Facienda, que pide que les empreses dean de domiciliu fiscal el llugar onde tengan el so centru d'operaciones. La duplicidá de domicilios entamó una guerra ente Cataluña y Madrid por ver onde cotizaba la empresa, que-y dexaba a la comunidá autónoma agraciada una tayada de 33,22 millones d'euros. La mesma batalla, qu'a la fin ganó Madrid, piérdela agora Asturies precisamente a favor de Cataluña a cuenta de Chupa Chups. La famosa multinacional del carambelu tenía hasta agora domiciliu fiscal n'Asturies, onde entamó l'actividá de la empresa a últimos de los años 50 y onde entovía tien la sé social, anque va tiempu que Barcelona ye l'auténticu epicentru del imperiu Chupa-chups, que tien el so mayor mercáu en Rusia y que facturó l'añu pasáu 414 millones d'euros. El cambéu de sé fiscal nun supón -de momentu- una mengua nos ingresos del fiscu astur, anque otra cosa sedrá si los inventores de la porra deciden salir a cotizar a bolsa.

Contador Estadistiques