Asturies pierde renta

Asturies, país que, entovía sofriendo la crisis industrial, aguantaba penriba la media estatal de riqueza particular, ta cayendo al pozu de les comunidaes de "xente probe".
Asina lo certifica la entidá catalana La Caixa, que tolos años prepara l'Anuariu Económicu d'España, un informe en que se ven los datos de renta per cápita per autonomíes y conceyos xunta otros indicadores de consumu como la cantida de coches matriculaos, linies de teléfonu, superficie de centros comerciales y otros qu'ayuden a entender la estructura económica del llugar, casu de los indicadores de producción industrial.

Ello ye que, por primer vez na historia, Asturies queda perbaxo la media estatal de renta nesti estoyu estadísticu. Con una renta per cápita ente los 8.800 y los 9.700 euros, namás los asturianos de más posibles raspiaríen col escalon más baxu de la media española, que ta ente los 9.700 y 10.650 euros. Per conceyos, 57 de los 62 ayuntamientos asturianos que salen en estudiu (namás s'estudien los conceyos de más de 1.000 habitantes) queden perbaxo d'una media cola que concueyen Xixón, Siero y Noreña (en tiempos conceyu con mayor renta per cápita d'España) y que namás pasen Uviéu y Llanera. Llama l'atención que nel anuariu del 2.002 namas 12 conceyos de los 62 taben perbaxo d'aquella media.

Como caxigalines estadístiques d'esti estudiu que pue descargase enteru de baldre nel web de La Caixa, dicir que n'Asturies hai 437.928 llinies de teléfonu, 522.523 coches y demás vehículos 869 oficines de bancu, 13.398 industries 3.497 comercios mayoristes 23.312 minoristes y 9.041 restoranes y bares