Asturies pide a Sanidá la redistribución de vacunes sobrantes de Janssen

Pa completar les inmunizaciones pendientes ente mayores de 40 años. Esti miércoles rexistráronse 372 casos nuevos de COVID-19.

Pablo Ignacio Fernández Muñiz, conseyeru de Salú, pidió ayeri nel Conseyu Interterritorial del Sistema Nacional de Salud la redistribución ente autonomíes de les vacunes sobrantes de Janssen. “Nun podemos parar", esplicó llueu del aconceyamientu, y énte la "falta de candidatos mayores n'otres comunidaes autónomes" fai esti pidimientu "que nos ayudaría a completar los casos pendientes neses edaes de más de 40 años”.

A falta de la espublización de los datos oficiales de COVID-19, Salú comunicó la detección ayeri de 372 casos nuevos –l'actualización reduz el total a 367 por duplicaos en díes previos–. Son 20 más que'l martes, cuando s'informó de 352.

La tasa de positividá diaria tamién ye mayor, un 13,58 por cientu al facese 3.733 pruebes de diagnósticu d'infeición activa, pol 12,53 por cientu de la xornada anterior. A 7 díes, esti porcentaxe taba enantes de l'actualización nun 13,49 por cientu –ayeri xubió al 13,52 por cientu–.

Hebo que llamentar la muerte de dos persones, dos homes de 86 y 69 años. Dende qu'entamó l'andanciu suménse 1.999 finaos cola enfermedá cuasada pol coronavirus SARS-CoV-2.

156 pacientes tán hospitalizaos con confirmación o sospecha de COVID-19, a los qu'hai que sumar otros 28 ingresaos na UCI. Son 3 y 2 más que'l martes, de manera respeutiva.

20 biltos activos

Asturies informó al Ministeriu de Sanidá de la esistencia de 20 biltos activos, 5 menos qu'hai dos selmanes, con un total de 174 casos. 6 brotos detectáronse estos 7 díes últimos, comunica la conseyería.

Na semeya, Fernández Muñiz nel aconceyamientu telemáticu d'ayeri.