Asturies permite un máximu de 10 persones nes celebraciones de Navidá

El Gobiernu decidió esti vienres les midíes que va imponer estes Navidaes, feches nel que país va siguir zarráu, pa tratar de torgar l’espardimientu del coronavirus SARS-CoV-2. Finalmente’l tope de persones en Nuechebona, Navidá, Nuechevieya, Añu Nuevu y Reis va ser de 10 persones pertenecientes a 2 grupos de convivencia.

Esta tarde ta prevista la espublización nel BOPA del decretu que va especificar con detalle toles restricciones que van tar vixentes del 23 d'avientu al 6 de xineru. La Conseyería de Salú adelantó qu’Asturies va siguir zarrada nes fiestes navidiegues, anque va permitir l’accesu y la salida de ciudadanos pa visitar a familiares y allegaos, términu esti que define como “persones coles que, ensin tener una rellación de parentescu, haya un venceyu afeutivu de pareya o análogu”.

Nes celebraciones de los díes 24, 25 y 31, y 1 y 6 de xineru va permitise un máximu de diez persones, sacante vivan xuntos. Amás, nestos axuntamientos namái van poder coincidir dos grupos de convivencia.

Ampliación del toque de queda

El llunes, xunto cola reapertura de la hostelería, va retrasase una hora’l toque de queda, que pasa a ser de 23 a 6 hores. Ésti va ampliase en Nuechebona y Nuechevieya hasta la 1.30 hores “esclusivamente pa facilitar el regresu al domiciliu”.

Otra manera, nun se van autorizar cabalgates de Rei, carreres de San Silvestre nin campanaes la nueche del 31, al consideralos eventos que podríen aumentar l’espardimientu del coronavirus por atrayer a munches persones.

Alvertencia a los estudiantes

El conseyeru Pablo Ignacio Fernández Muñiz alvirtió a los estudiantes que tornen al so llar esta Navidá que “deben de restrinxir dafechu l’actividá social que tenga los díes previos porque esa vuelta pue poner en riesgu a la so familia”. El Gobiernu llama a la prudencia y a la responsabilidá individual y coleutiva pa reducir la movilidá y los contautos sociales estes fiestes.