Asturies perdió un total de 7.648 habitantes a lo llargo del añu 2016

La sangría demográfica nun apara n’Asturies. Los datos del padrón municipal con fecha del 1 de xineru del 2017, oficializáu recién pol Gobiernu estatal, asitien la población del país en 1.034.960, lo que significa una perda de 7.648 habitantes a lo llargo del 2016.

Esta cantidá supón una mengua del 0,73 por cientu, el decensu mayor de tol Estáu, namái superáu por Castilla y Lleón, que rexistró un 0,89 por cientu. Nel llau contrariu tán Illes Balears, que medra un 0,79 por cientu y la Comunidad de Madrid, un 0,62 por cientu, siendo la media estatal del 0,03 por cientu: 15.124 persones más p’algamar un total de 46.572.132 habitantes.

Los datos difundíos pola Sociedá Asturiana d’Estudios Económicos y Industriales (Sadei) a partir de los del Instituto Nacional de Estadístisca (INE) afiten que’l descensu de población n’Asturies ye xeneral, con namái 4 conceyos onde medra la población: Santu Adrianu (2,96 por cientu), Peñamellera Alta (2,06 por cientu), Peñamellera Baxa (0,64 por cientu) y Cabranes (0,57 por cientu). En cifres absolutes, sicasí, l’aumentu ye probe al ser de 33 persones.

Nel llau contrariu tán Yernes y Tameza, con una perda del 9,68 por cientu d’habitantes, y  Pezós, con un 8,24 por cientu. Los conceyos de mayor población siguen siendo Xixón, con 272.365 persones, rexistrando nel 2016 una baxada de 1.057, y Uviéu, con 220.301, que pierde 266, mentes que Yernes y Tameza torna a ser el menos pobláu, con 140.