Asturies participa nel Día Internacional de les Llingües Minorizaes en Redes Sociales

Celébrase'l martes col oxetivu de facer visible l'asturianu y otros quince idiomes al mundu.

Iniciativa pol Asturianu encargóse de coordinar la celebración del Día Internacional de les Llingües Minorizaes en Redes Sociales en tol territoriu del asturlleonés. Asina, vien trabayando dende hai meses pa sumar a empreses y organizaciones pa que collaboren nesti proyeutu con orixe nel coleutivu frisiu Afûk que va desendolcar delles actividaes a lo llargo del día.

De 9 a 17 hores va entamase 'La hora de la llingua', na que les asociaciones, organizaciones y usuarios unviarán un mensaxe saludando a les demás llingües y cada asociación responderá a los mensaxes mientres 30 minutos. Pa ello va utilizase la etiqueta oficial de la iniciativa, #EDL2017, en referencia al European Day of Languages, asina como la propia, que nel casu d'Asturies va ser #asturianu siguíu del común del dominiu, #asturllionés, mentes qu'en Lleón va usase #llionés y en Miranda de l Douro, #mirandes.

Tamién va encamentase a los usuarios a xubir vídeos na so llingua diciendo unes poques pallabres y retando a otres persones a facer lo mesmu. Pa ello, pueden dicir namái quién son, d'aú vienen, qué llingua falen y el mensaxe que quieran tresmitir.

Los idiomes participantes son, amás del asturianu, el gaélicu, el galés, el manés, l'estoniu, el catalán, el gallegu, el córnicu, el maltés, l'eusquera, el friulanu, el mazovianu, el gaélicu escocés, el sorbiu y el frisiu. Ye posible atopar más información sobre estes llingües y l'eventu calcando nesti enllaz.