Asturies participa nel 'Comité de les Rexones' qu'aconceya n'Eslovaquia

|

Guillermo Martínez, conseyeru de Presidencia y Participación Ciudadana, participa estos díes nel 'Comité de les Rexones' de la Xunión Europea (XE) que se celebra en Prešporok (Bratislava). Asturies sofita la declaración en respuesta a la salida del Reinu Xuníu del proyeutu européu común que fai l'asamblea.

La declaración “llamenta, pero respeta” la decisión adoptada pola ciudadanía británica, anque confía en que'l Reinu Xuníu siga siendo nel futuru un sociu importante de los 27. El testu, sicasí, defende a la XE como'l meyor preséu pa garantizar el futuru desenvolvimientu de los países que la integren, la crecedera y la cohesión social y pa encarar los desafíos a los que s'enfrenta'l continente.

“La Xunión ye la forma más eficaz de facer frente a los retos que nos plantega'l sieglu XXI, como la crecedera sostenible, l'emplegu y la cohesión social, el cambiu climáticu, l'amenorgamientu de la población europea, la seguridá mundial, l'aumentu de les desigualdaes y los fluxos migratorios. Los entes rexonales y llocales disponen de los saberes y la capacidá necesarios pa responder a estos desafíos. Pero tienen que contar cola estabilidá del presupuestu de la XE, yá que xestionen una gran parte del mesmu al traviés de los fondos estructurales y d'inversión y d'otres fontes de financiamientu que sofiten la innovación y la competitividá”, reza la declaración.

“Repitimos el respaldu plenu de los entes locales y rexonales de la XE al proyeutu européu basáu nos valores democráticos de promover la paz y el bienestar de la so ciudadanía, dando prioridá a estos y respetando tolos niveles de gobiernu”, concluye'l testu.

'Declaración de Prešporok'

Asturies tamién va sofitar la 'Declaración de Prešporok', qu'inclúi una estratexa territorial integrada y avanza hacia una coordinación meyor ente los distintos niveles de gobiernu de les rexones europees, asina como hacia una mayor participación de la ciudadanía na toma de decisiones. El documentu tamién va defender una mayor cohesión de los países miembros de la XE y una medría de la inversión pa frenar les crecientes diferencies de les rexones europees, inclusive dientro d'un mesmu Estáu miembru.

Les recomendaciones adoptaes na cume van ser treslladaes darréu a les principales instituciones polítiques europees, esto ye, al Parllamentu, al Conseyu y a la Comisión. En Prešporok van tar presentes, ente otres autoridaes, el vicepresidente de la Comisión Europea (CE) y comisariu pa la Crecedera y Emplegu, Competitividá y Inversión, Jirky Katainen; la comisaria de Tresportes, Violeta Bula; y el vicepresidente del Bancu Européu d'Inversiones, Laszlo Baranyai.

Al empar, los territorios y ciudaes europees presentes nel 'Comité de les Rexones' debaten anguaño la so posición al respeutive de les prioridaes financieres y de gastu de la XE pal periodu 2014-2020 y l'escenariu pal periodu presupuestariu próximu. Asturies ye, xunto a Catalunya, Illes Balears y Galicia, una de les cuatro comunidaes autónomes del Estáu que soscribieron la iniciativa de la rexón austriaca de Niederösterreich a favor del caltenimientu de los fondos de cohesión pal periodu 2020-2027 al considerar que son fundamentales p'ameyorar el desenvolvimientu social y económicu européu y rebaxar les diferencies de renta ente los distintos estaos y ente territorios, inclusive, dientro d'un mesmu estáu.

La iniciativa va presentase’l mes de setiembre a les autoridaes comunitaries pa que tengan en cuenta la posición de los representantes de les entidaes rexonales y llocales de la XE.

Contador Estadistiques