Asturies participa na feria turística ITB Berlin

Julio González Zapico, direutor xeneral de Comerciu y Turismu, vende los itinerarios asturianos venceyaos al Camín de Santiago nesta importante feria que tien llugar estos díes na capital xermana. Alemaña ye'l segundu mercáu internacional p'Asturies.

Nuna reunión celebrada ayeri, el representante del Gobiernu presentó a siete operadores especializaos y cinco asociaciones xacobees alemanes, qu'axunten a más de 1.800 asociaos, la importancia d'estes rutes del Camín del Norte. “Pudimos confirmar el respaldu que supunxo pa los dos itinerarios asturianos la declaración de la ruta como patrimoniu mundial per parte de la UNESCO nel 2015, polo que ye'l momentu de reforzar la so promoción según les rellaciones que, dende hai años, tamos impulsando con operadores y asociaciones xacobees, nesti casu, alemanes”, resaltó Zapico.

El direutor xeneral sorrayó qu'Alemaña ye'l segundu mercáu internacional n'importancia p'Asturies, depués de Francia, y que creció un 55 por cientu nos cinco años últimos. Tamién señaló que'l turista alemán demanda “un productu de calidá qu'Asturies-y puede ufiertar”.

Na feria ITB Berlin, que se celebra dende ayeri hasta'l domingu na capital xermana, Asturies va promocionase en 24 alcuentros programaos con operadores turísticos y medios de comunicación. Con estes xuntes, la Conseyería d'Emplegu, Industria y Turismu pretende reforzar la imaxe d'Asturies como destín turísticu nel mercáu alemán.