Asturies participa na candidatura de la téunica de construcción de piedra en seco a Patrimoniu Inmaterial de la Humanidá

Los corros, les cuerries o los cortinos, tradicionalmente fechos cola téunica de piedra en seco, podríen ser pronto Patrimoniu Cultural Inmaterial de la Humanidá. Asturies participa nuna candidatura pa qu’esta téunica de construcción algame esti reconocimientu.

Con orixe en Chipre y Grecia, a la mesma foron sumándose otros territorios como Croacia, Eslovenia, Suiza, Italia o Francia, asina como delles comunidaes del Estáu como Asturies, Galicia, Extremadura, Andalucía, Aragón, Canarias, Catalunya y la Comunitat Valenciana. L’oxetivu ye que la UNESCO declare nel 2018 la téunica de construcción de piedra en seco como Patrimoniu Cultural Inmaterial de la Humanidá.

Ésta consiste nel emplegu de piedres mientres una colocación ordenada de les mesmes, ensin utilizar cualquier sustancia pa compactales. Edificaciones con pesu na tradición del país, como los corros, les cuerries, los cortinos o les muries de zarru de finques nes brañes emplegaron esta téunica, ufriendo entovía multitú d'exemplos a lo llargo de tola xeografía asturiana.