Asturies participa en Mérida nun alcuentru con touroperadores británicos

Pa reforciar la promoción turística en Reinu Xuníu, segundu mercáu pal país.

Téunicos de Turismu d'Asturies participen estos díes nes xornaes de trabayu 'Spain, a high end rural, cultural and gastronomic destination', entamaes por Turespaña en Mérida. Ente ayeri y güei, va caltener xuntes con empreses como Exodus, Casas Cantábricas o Keytel International, que yá inclúin al país na so ufierta de destinos, xunto con otros nuevos qu'inda nun operen n'Asturies, hasta sumar un total de 14.

El Reinu Xuníu ye'l segundu mercáu más importante, tres Francia, pal turismu asturianu. Por esti motivu, recién inauguróse una páxina en Facebook n'inglés, que yá cuenta con 2.000 siguidores, y principióse cola campaña 'Come home to Paradise'. L'aumentu de les conexones aérees ente Asturies y Londres va ayudar tamién a un incrementu de les visites al país por parte de ciudadanos británicos.