Asturies píde-y a la UNESCO que reconoza'l camín del norte a Compostela

Los gobiernos d'Asturies, Cantabria, País Vascu y Galicia apautáronse en presentar conxuntamente énte la UNESCO, una propuesta pidiendo l'ampliación de la declaración del Camín de Compostela, declaráu nel añu 1993 Patrimoniu Mundial de la Humanidá, col oxetivu de que se reconoza tamién con esta categoría al "Camín del Norte" o primitivu, primer peregrinación qu'históricamente axuntó Uviéu con Compostela y que dempués tamién empató col camín que pasa per tola costa del Cantábricu.

Anguaño la declaración defende a cuatro caminos alternativos, pero'l camín de la costa ta ensin esti reconocimientu oficial qu'agora se demanda. El trámite pa llogralo va entamar nel Conseyu del Patrimoniu Históricu Español, que tien de da-y agora'l preste a la solicitú de les cuatro comunidaes autónomes, pasando darréu d'ello l'espediente a instancies de la Unesco.

Acordies con datos del Gobiernu asturianu, nesta llexislatura les instituciones lleven invertíos na recuperación y caltenimientu del camín de Compostela sobre 6 millones d'euros, peritándose en cerca de 20.000 los pelegrinos qu'emplegaron el camín asturianu a Compostela nel 2005.