Asturies nun ye cooperativa

El Gobiernu asturianu tien abiertu'l plazu pa presentase a les subvenciones que concede, nel marcu de dellos programes europeos, pa la creación d'empreses d'economía social. Esta denominación, qu'arreya delles clases d'empreses como Cooperatives o Sociedaes Anónimes llaborales, identifica a negocios que se gobiernen d'alcuerdu a unes bases democrátiques de repartu de derechos y responsabilidaes de tolos socios que los faen. Les empreses d'economía social tuvieron un papel de primer orde como elementos de desarrollu en comarques en crisis, y quiciás l'exemplu que tengamos más cerca seya'l de la Cooperativa de Mondragón, un proyectu que, dende una base cooperativista, asoleyó proyectos como Fagor y
Eroski, convirtiéndose na primer empresa vasca.

N'Asturies, anque'l Principáu y dellos axentes sociales caltienen una fundación pa que salgan alantre proyectos d'economía social, nun pue dicise que'l modelu cooperativu enraigonare nel texíu económicu. Nesti sentíu, nun hai más qu'echar una güeyada a los datos de la mesma fundación, que dan una cifra de 668 empreses d'economía social actives a fecha del 2001 emplegando a 6.188 persones, cuando'l total estatal nesa mesma data ye de 38.669 empreses (ente SAL y cooperatives) que dan trabayu a 370.000 persones.