“Asturies necesita un polu d’izquierda que piense en clave asturiana”, asegura Faustino Zapico

|
Faustino Zapico actu d'IAS con IX nel 2016 (Concha Masa)

Izquierda Asturiana (IAS) va dir en coalición a les eleiciones a la Xunta Xeneral del 26 de mayu con Izquierda Xunida (IX) tres la decisión tomada nel XIV Alcuentru Nacional de la organización. “Asturies necesita un polu d’izquierda que piense en clave asturiana”, asegura’l so secretariu xeneral, Faustino Zapico.

La propuesta de coalición va llevala la direición d’IX güei a la Comisión Colexada'l y a la Coordinadora del xueves, cola intención d’abrir un procesu de primaries que concluya enantes de que fine febreru. Nun ye la primer vegada que dambes formaciones algamen alcuerdos eleutorales nestos años a nivel municipal, como ye’l casu de Mieres, o de cara a les Estatales, qu’agora s’amplía de cara a les eleiciones a la Xunta Xeneral.

“Na Coordinadora del 26 de payares yá diximos que buscaríamos la mayoría d'alcuerdos posibles con otres fuercies que sían inequívocamente d'izquierdes. Y, nesti casu, al igual qu'en dalguna ocasión más, vamos plantegar una coalición electoral cola Izquierda Asturiana, col IAS. Nun ye la primer vegada, yá lo fiximos en delles ocasiones. En dellos conceyos yá esiste esa alianza”, apuntó Ramón Argüelles, coordinadora xeneral d’IX, que considera a la formación nacionalista como una organización seria y comprometida, tanto cola izquierda como cola defensa de la llingua. La so intención ye formar una comisión eleutoral con miembros d’IX y IAS que s’encargue tanto d’afitar el reglamentu p'allegar a les primaries como les mesmes primaries: “La idea sería que s'escoyera una candidatura conxunta, como lo que veníamos apregonando dende IX, que se someta a les bases. Una candidatura xunida, conxunta y que se vote tanto a la cabeza como a esa candidatura”.

A la espera de la ratificación d’IX, IAS yá dio’l preste a la candidatura conxunta nel XIV Alcuentru Nacional d’IAS celebráu recién. Dambes sigles van apaecer nes papeletes, anque la idea ye presentar una marca eleutoral que se podría asemeyar a ‘Asturies pela Izquierda’.

“Dende les eleiciones del 2015 venimos teniendo alcuerdos con IX y creemos necesario crear un polu d’izquierdes claru y pautáu n’Asturies. Vemos que n’IX, a pesar de ser una organización de carauter estatal, hai una voluntá a pensar en clave asturiana; a dar una respuesta con voz propia a la situación esistente nuna Asturies abandonada, que sufre’l fin de la minería, y al contestu políticu que vivimos”, apunta Zapico. IAS, que se define como una fuercia republicana, socialista y verde, va celebrar un Alcuentru Nacional nuevu en febreru pa siguir avanzando nel desarrollu de la coalición.

Na semeya, Zapico, cola diputada Concha Masa detrás, nun actu celebráu en febreru del 2016 por Unidá Popular, coalición na que foi IX y IAS a les Estatales d'avientu del 2015 xunto con Unidad Popular en Común.

Contador Estadistiques