“Asturies, llueu de 40 años del Estatutu, tien agora la oportunidá d’iguar la so anomalía constitucional”, apunta l’ALLA

L’Academia de la Llingua Asturiana (ALLA) fai un llamáu “a los partíos constitucionalistes pa que sofiten, acordies col marcu llegal vixente, la oficialidá de les llingües d'Asturies”. La institución considera que’l país, “llueu de 40 años de vixencia del Estatutu d'Autonomía, tien agora la oportunidá d’iguar la so anomalía constitucional”.

Nun comunicáu recuerda que “el marcu xurídicu nel que se recueyen los derechos llingüísticos de la ciudadanía afítase nel Títulu Preliminar de la Constitución Española. D’esti mou, el so artículu 3.2 ye inequívocu: ‘las demás lenguas españolas serán también oficiales en las respectivas Comunidades Autónomas de acuerdo con sus Estatutos’”. El mesmu camín que se siguió en Galicia, Euskadi, Navarra, Catalunya –col catalán y l’aranés–, Comunitat Valenciana y Illes Balears.

“Esto, que ye lo que les fuerces polítiques mayoritaries na Xunta Xeneral del Principáu quieren facer cola llingua asturiana, nun ye, nin más nin menos, que’l cumplimientu n’Asturies de la previsión constitucional. Ye más, dende esi puntu de vista y sensu stricto podría dicise que cualquier invitación a que la norma máxima de convivencia nun se cumpla ente nós ye un comportamientu duldosamente democráticu”, recuerda la institución. “Asturies, llueu de 40 años de vixencia del Estatutu d’Autonomía, tien agora la oportunidá d’iguar la so anomalía constitucional pa, en condiciones d’igualdá de derechos, poder protexer un patrimoniu llingüísticu d’un valir cultural incuestionable”, insiste.

Aición pedagóxica énte les estratexes d’alarmismu intencionáu

Sobre’l proceso de reforma de la norma, l’ALLA pide a les formaciones abiertes a la negociaciones, esto ye, la Federación Socialista Asturiana (FSA), Podemos, Izquierda Xunida (IX) y Foro, “un fondu determín pa plantegar una reforma estatutaria qu’asegure la llibertá del usu llingüísticu y una aición pedagóxica que desanicie les estratexes d’alarmismu intencionáu que davezu s’intenten esparder ente nós”. D’igual forma, encamienta-yos a “nun cayer nes provocaciones dialéutiques que dende dalgunos sectores minoritarios vienen xenerándose col envís d’enzangar el discutiniu parllamentariu qu’acaba d’abrise”.

Al restu de fuercies que punxeron la oficialidá como llinia collorada pa la negociación, Partido Popular (PP) y Ciudadanos, llámalos “col más fondu respetu” a que “con sentíu d’esti momentu históricu y n’atención a la importancia social y cultural de la propuesta, se xunten al marcu de consensu entamáu”. Nesi sen recuerda que’l “modelu asturianu d’oficialización requier d’una llei posterior d’ámbitu autonómicu na qu’han fixase les llendes de la política llingüística qu’Asturies necesita acordies cola nuesa realidá sociolóxica, política y económica. La necesidá del consensu tendrá equí, de mou especial, una mayor xustificación, darréu que se tará falando de les concretes midíes que la oficialidá implica, por exemplu, nos ámbitos institucional, educativu o de los medios de comunicación”.

Pa finar, “acordies cola so función tutelar (art. 2.e de los sos estatutos)”, l’ALLA úfrese a tolos partíos “pa, nel so casu, sofitar la busca d’un alcuerdu efeutivu y durable pal caltenimientu de les nueses llingües”.

Na semeya, páxina de la Constitución española n'asturianu onde se ve l'artículu 3.