Asturies llora la perda d’Elías García, pioneru, referente y maestru de la música asturiana

|
Elías García

La noticia llegaba’l sábadu pela mañana como un golpe duru al alma d’Asturies. Elías García, componente de Llan de Cubel, Felpeyu y Tuenda, y pareya musical de Mapi Quintana y Rubén Bada, ente otros proyeutos, dexábanos a los 51 años de muerte natural.

La falta de respuesta nel teléfonu alertó a los más allegaos, qu'acudieron al so domiciliu en Meres y atopáronlu ensin vida. Una vegada más, la familia del folk asturianu sufría nes sos carnes la desgracia d’una muerte prematura.

L’uvieín Elías García, biólogu de formación y ornitólogu reconocíu, foi fundador nel 1984 del grupu que más contribuyó a la evolución de la música tradicional asturiana y que pue dicise que derrompió un camín nuevu pa xeneraciones de músicos que lu garraron como modelu. Trátase de Llan de Cubel, la mítica banda que precisamente yá tien pa entrar en fábrica’l so sestu discu, que va llevar el nome de ‘La lluz encesa‘ y que xunto con Felpeyu dieron a conocer internacionalmente la música del país.

Xunto con Fonsu Mielgo, Susi Bello, Daniel Lombas, Guzmán Marqués y Marcos Llope echaron a andar un proyeutu que trespasaría les llendes d’Asturies, siendo munches de les sos pieces versionaes por formaciones de tol arcu atlánticu y un referente pa les munches bandes que vendríen depués. Multinstrumentista, entamó tocando la gaita y la xiblata a mediaos de los 80 y foi l'introductor n'Asturies del bouzouki, instrumentu de cuerda d’orixe griegu que la música tradicional irlandesa incorporó na segunda metá del sieglu XX y al qu’Elías trespasó de manera maxistral los sones del país. Tamién dende los primeros 90 del sieglu pasáu Elías García entamó a tocar el vigulín, siendo ún de los vigulineros que fixeron resurdir la técnica d'esti instrumentu n'Asturies.

Abiertu siempre a collaboraciones, participó nel primer discu de Felpeyu, nel añu 1994, tocando’l vigulín en ‘Llevántate neña’ y ‘L’Ablanera’. Pal segundu, ‘Tierra’ (1997), yá fomaba parte de la banda, de la que siguía siendo miembru anguaño tres nun participar en ‘Canteros’ (2008), siendo responsable del bouzouki en ‘Cerquina’ (2017), trabayu últimu del grupu.

Xunto con Xosé Antón Fernández ‘Ambás’ y Pepín de Muñalén entamó nel 2003 otru de los proyeutos qu’ayudaron a revitalizar la música tradicional asturiana: Tuenda. Esti tríu dedicáu a rescatar cantares de la tradición oral d’Asturies fixo nesti tiempu un llabor impagable que se rexistró en trés discos. Tamién collaboró con músicos de gran prestixu na escena internacional como Tanahill Weavers, The Battlefield Band o John McSherry.

Nos años últimos sumó un proyeutu nuevu a la so trayeutoria, acompañando a Mapi Quintana na intrepretación de pieces del repertoriu tradicional nun amiestu del jazz y el folk. Tamién trabayara estos años pasaos xunto con Leticia Baselgas y Rubén Bada en dellos proyeutos y la selmana pasada dexaría’l so sellu últimu nuna collaboración pal discu próximu de la Banda Gaites Fonte Fuécara.

Dos díes depués de la so muerte, la conmoción sigue nel mundu de la música y la cultura asturiana. García dexa un legáu incalculable, pero tamién un güecu que será difícil de cubrir.

Semeya de Llan de Cubel.

Contador Estadistiques