Asturies llora la muerte de Quini, lleenda del gol

|
Quini Fundación Caveda y Nava con Eugenio Prieto y Inaciu Iglesias

Les aficiones del Sporting y l’Uviéu gárrense la mano pa homenaxar a la lleenda del fútbol asturianu Enrique Castro ‘Quini’, fináu de sópitu’l martes en Xixón a los 68 años d’edá. El de Llaranes foi una persona comprometida pa con Asturies y l’asturianu.

La noticia de que ‘El Brujo’ sufrió una parada cardiaca mientres conducía corrió ayeri como la pólvora per Xixón. Les primeres informaciones que llegaben per redes sociales o pel boca a boca dicíen que los servicios médicos trataben de reaunimalu. Les siguientes, confirmaben la so muerte, dexando güerfana y murnia la ciudá.

Y ye que Quini yera más que’l meyor futbolista que dio’l fútbol asturianu. Yera una persona querida pola so humildá, tratu y cercanía, siendo habitual velu per Xixón, mui lloñe de l’actitú que muestren les estrelles de la pelota d’anguaño.

Un exemplu de la so categoría y del ciñu que-y tenía la xente ye la reaición que xeneró la so muerte, con repercusión en tolos medios de comunicación, deportivos y non deportivos; de personalidaes del mundu del fútbol, dende Kempes a Maradona; y d’hasta de la política, con un tweet llamentando la so perda del presidente del Gobiernu estatal, Mariano Rajoy. La so figura tamién foi quien a xunir a les aficiones del Sporting y del Uviéu, rivales eternos qu’ayeri coincidíen n’honrar a ‘El Brujo’, al igual que los siguidores d’otros clubes del país.

7 pichichis

Nacíu n’Uviéu un 23 de setiembre del 1949, Quini crióse nel pobláu de Llaranes, apegáu a ENSIDESA. Ehí dio les primeres zapataes a una pelota, llegando a destacar nel club llocal que llevaba’l nome de la siderurxa, polo que llamó l’atención del Sporting, nel que debutó de la mano Carriega, téunicu que finó precisamente’l pasáu día 13.

Yera avientu del 1968 y el comienzu d’una época gloriosa del club xixonés –dos descensos pentemedies–, con Quini llevando’l 9 na camiseta roxiblanca y marcando decenes de goles. Hasta’l 1980 defenderíala, momentu nel que’l Sporting decidió trespasalu al Barcelona, onde-y llegaron los títulos que se-y resistieron en Xixón, ente ellos una Copa que ganó al so club del alma naquella final del 1981 nel Vicente Calderón: 3-1 pa los catalanes, anotando’l primeru y el segundu, tres el gol de Maceda que ponía la igualada.

Nel 1984, con 35 años, Quinocho tornaría les files del Sporting pa finar la so carrera trés años depués. Detrás quedaba una trayeutoria esceicional nel fútbol profesional defendiendo les camisetes del Sporting y Barcelona, colos que llevaría siete pichichis (cinco en Primera, trés d’ellos col club xixonés, y dos en Segunda), y dos participaciones en mundiales (Arxentina’78 y España’82) y una nuna eurocopa (Italia’80’).

Pese a dexar el fútbol n’activu, nun abandonaría’l mundu de la pelota, yá que pasó a ocupar cargos dientro’l club, primero como ayudante téunicu, llueu como delegáu del primer equipu y yá dende’l 2015 como responsable de Rellaiciones Institucionales del Sporting. Nesti tiempu, concretamente nel 2006, superó una batalla contra’l cáncer, con un cáncanu na garganta que lu obligó a pasar pel quirófanu.

Amor por Asturies

Fuera de los terrenos de xuegu, Quini mostróse como una persona comprometida con Asturies y con cualquier causa noble, ente elles la dignificación del asturianu. Asina, nel 1977 sofitó xunto con otres personalidaes como José Manuel Fuente ‘El Tarangu’ la candidatura de la Unidá Rexonalista, y darréu participó en campañes como ‘Doi la cara pola oficialidá’ o #ElCantarDelVasu, na que se-y daba visibilidá a la tresmisión del asturianu d'unes xeneraciones a otres.

D’igual forma, foi patronu d’honor de la Fundación Caveda y Nava, entidá nacida pa defender un consensu social de mínimos a favor del reconocimientu social y llegal de la llingua asturiana y que se disolvió nel 2015 al considerar cumplíu’l so oxetivu depués de 14 años de trabayu.

Funeral n’El Molinón

Esta tarde, a les 20 hores, va oficiase’l so funeral nel llugar onde dexó buelga: El Molinón. Nel municipal xixonés ta instalada tamién la so capiella ardiente, per la que tán pasando miles d’aficionaos dende la mañana.

Javier Fernández, presidente del país, confirmó la so asistencia a la ceremonia de despidida de 'El Brujo'.

Na imaxe, Quini nel 2006 xunto a Eugenio Prieto, ex presidente del Uviéu, y Inaciu Iglesias, presidente naquel momentu de la Fundación Caveda y Nava, nel actu nel que'l de Llaranes foi nomáu patronu d'honor de la entidá.

Contador Estadistiques