Asturies lidera la baxada del paru nel trimestre según los datos de la EPA

|
Paru ferramienta

Namái Ceuta cuenta con meyor porcentaxe de descensu. Xube un poco la ocupación nel país, pero mengua enforma la población activa.

Asturies ameyora datos del primer trimestre del añu na última Encuesta de Población Activa (EPA) que dio a conocer esta mañana l'Instituto Nacional de Estadística (INE) depués de les males cifres del anterior. Baxa en 6.700 persones, un 10,49 por cientu, pa dexar el total de desemplegaos en 57.400.

Nel Estáu rexistróse un aumentu de 103.800 paraos, un 3,43 por cientu, pa llegar a los 3.127.800. La EPA afita la tasa de paru n'Asturies nel 13,06 por cientu, una cifra daqué inferior a la media estatal, que queda nel 13,26 por cientu.

La ciudá autónoma de Ceuta ye'l territoriu que presenta un mayor descensu, un 25,51 por cientu, mentes que Cantabria, con un 10,13 por cientu, apaez como'l siguiente na llista. Los mayores aumentos atópense n'Illes Balears (68,76 por cientu), Canarias (19,82) y Navarra (19,54).

En términos interñales, el paru medró n'Asturies en 4.800 persones, un 9,03 por cientu, namái superada por Navarra (16,84) y la Comunitat Valenciana (10,90). Nel Estáu baxó en 47.000, un 1,48 por cientu.

Nun son bonos, sicasí, los datos d'ocupación y población activa. El primeru aumenta namái en 500 persones, un 0,14 por cientu –nel Estáu baxa un 0,5 por cientu–, y el segundu desciende en 6.200, un 1,39 por cientu –aumenta un 0,39 por cientu nel conxuntu d'España–.

Contador Estadistiques