Asturies, Galicia, Cantabria y Castilla y Lleón lleven a l’Audiencia Nacional la prohibición de caza del llobu

Los conseyeros de Mediu Rural y de Mediu Ambiente d’Asturies, Galicia, Cantabria y Castilla y Lleón aconceyaron esti martes en Santander xunto colos sindicatos agrarios pa tratar la respuesta a la inclusión del llobu nel Llistáu d’Especies Xabaces en Réxime de Proteición Especial (LEXPRE). Les cuatro autonomíes van presentar recursos na Audiencia Nacional y quieren llevar l’asuntu a Europa.

Guillermo Blanco, conseyeru de Desarrollu Rural, Ganadería, Pesca, Alimentación y Mediu Ambiente de Cantabria, foi l’encargáu d’anunciar la interposición de los recursos contenciosos alministrativos énte l’Audiencia Nacional contra la decisión d’incluyir al llobu nel LEXPRE y solicita al organismu xudicial que “suspenda cautelarmente los efeutos d’esta orde hasta qu’haya una sentencia firme”. Les cuatro autonomíes agospien el 95 por cientu de la población d’esti mamíferu, protexíu dende’l martes pasáu llueu del alcuerdu adoptáu na Comisión Estatal de Patrimoniu Natural y de la Biodiversidá, col votu del ministeriu, en febreru.

“Vamos recurrilo xurídicamente. Entendemos que ye un error la catalogación en cómo va afeutar a la ganadería estensiva, pero tamién al conxuntu de xestión de la especie yá que nos asitia nuna situación d’incertidume xurídica”, espresó Alejandro Calvo. El conseyeru asturianu apuntó que se da’l pasu de llevala a l’Audencia Nacional “por innecesaria, por precipitada y porque impide la continuidá na xestión”, y aseguró que, nel casu de caltenese, “tendremos qu’analizar y, seguramente, treslladar al ministeriu gran parte de la responsabilidá qu’agora asumimos dende Asturies na xestión de la especie”.

Otra manera, los cuato conseyeros anunciaron la so intención d’entrevistase col comisariu européu de Mediu Ambiente, Océanos y Pesca, el lituanu Virginijus Sinkevičius, pa espone-y la situación del llobu ibéricu y tresllada-y lo que supón “esti ataque del Gobiernu d’España hacia les polítiques medioambientales de la Xunión Europea”, afirmó Blanco.

Na semeya, Calvo, al fondu a la izquierda compartiendo mesa con Blanco; el presidente de Cantabria, Miguel Ángel Revilla; y los conseyeros de Galicia y de Castilla y Lleón, Ángeles Vázquez Mejuto y Juan Carlos Suárez-Quiñones, na xunto colos sindicatos agrarios en Santander.