Asturies esparde en Castilla'l Circuitu d'Artes Escéniques mientres se critica la so xestión

|
Puestu d'Asturies en Mercartes

Participa con puestu propiu na feria Mercartes, la más importante del Estáu. Escenasturias pide la dimisión de Genaro Alonso y Vicente Domínguez.

El viceconseyeru de Cultura y Deporte, Vicente Domínguez, asistió ayeri en Valladolid a l'apertura oficial de la sétima edición del Mercado de Artes Escénicas (Mercartes), que busca "potenciar l'alcuentru y les rellaciones ente los profesionales del sector, poner en valir a tolos axentes públicos y privaos que lo componen, y xenerar oportunidaes de mercáu". La feria, la más importante del Estáu pa profesionales y empreses teatrales, cuenta esti añu con 124 espositores, lo que supón una medra del 37 por cientu respeuto a la edición anterior, con presencia de 16 comunidaes autónomes, ente elles Asturies, y casi un millar de persones inscrites.

La intención del Gobiernu en Mercartes ye divulgar y potenciar el Circuitu d'Artes Escéniques, una de les ferramientes más importantes pal cumplimientu de los oxetivos de Cultura en cuantes al fomentu y l'impulsu de la creación y la divulgación del teatru asturianu, según esplicó Domínguez. Trátase d'un programa cultural promovíu pol Gobiernu dende'l 2001, anováu nel 2016, nel que participen 22 conceyos y 88 compañíes con 250 espectáculos presentaos.

Crítiques y protestes nel sector

Mientres Asturies esparde en Castilla'l Circuitu, n'Asturies profesionales del sector agrupaos n'Escenaturias reclamó esta selmana la dimisión del conseyeru Alonso y del viceconseyeru Domínguez. Acúsenlos de querer esmantelar el programa al camudar el sistema actual, al traviés de contratos direutos, por otru que se basa nuna llinia de subvenciones a los conceyos que, según alega Cultura, ye a lo qu'obliga la Llei de Contratación actual.

Dende Escenasturias, mentes, afirmen qu'esta norma cuenta con una esceición pa les artes escéniques. Tola oposición responsabilizó ayeri na Xunta Xeneral a Alonso y, sobre manera a Domínguez, d'una mala xestión del Circuitu y criticaron la política cultural del Gobiernu.

 

 

Contador Estadistiques