Asturies escoyerá ente 12 candidatures el 28-A

A falta de la proclamación definitiva por parte de la Xunta Eleutoral, prevista pal 2 d’abril, un total de 12 candidatures preséntense por Asturies al Congresu, mentes que pal Senáu hai 11 alternatives. Namái dos formaciones asturianes acuden coles sos sigles: Foro, en coalición col Partido Popular (PP), y Andecha Astur.

El númberu de candidatures ye la mesma que na convocatoria anterior, la del 26 de xunu del 2016, anque los actores son diferentes. Asina, debuten nunes eleiciones Actúa, el partíu impulsáu por Gaspar Llamazares –que se presenta por Madrid–, con Ángel José López Díaz como cabeza de llista; y el Partido Comunista de los Trabajadores de España (PCTE), escisión del Partido Comunista de los Pueblos de España (PCPE), que nun participa n’Asturies, mentes que torna Andecha Astur, tres dos convocatories refugando partipar nunes Estatales; y Por un Mundo más Justo (PUM+J).

Escaños en Blanco, que nun se presenta n’Asturies; UPyD, que nun participa; y l’inactivu Partido Unionista Estado de España (PUEDE), son les otres formaciones que se caen de l’anterior cita cola urnes. Otra manera, Actúa namái entamó llista pal Congresu n’Asturies.

Siete diputaos

Los partíos con representación por Asturies repiten fórmula cola esperanza de nun vese afeutaos pola perda d’un diputáu, pasando de 8 a 7 los que-y correspuenden Asturies por mor de la perda de población. La coalición PP-Foro, que ganó nel 2016 con 3 diputaos (35,28 por cientu del total de votos), acuden cola popular Paloma Gázquez y el forista Isidro Manuel Martínez Oblanca –el tercer puestu ye pal tamién popular José Luis Viesca– como cabeces de llista, quedando fuera Susana López Ares, númberu 1 nel 2016.

El PSOE, que cuenta con 2 escaños (24,84 por cientu) caltién a Adriana Lastra como candidata, cola ministra de Sanidá, Consumu y Bienestar Social, María Luisa Carcedo, como númberu 2. El 3 ye pa Roberto García Morís.

Unidos Podemos/Xuníos Podemos, coalición qu’algamó 2 representes (23,78 por cientu) na que diba Izquierda Asturiana (IAS) xunto con Podemos, Izquierda Unida (IU), EQUO y CLIAS, con toles sigles incluyíes nes papeletes, camuda de nome al femenín pa pasar a ser Unidas Podemos, perdiendo la denominación asturiana. Sofía Castañón sigue como cabeza de llista y Juan Antonio González Ponte, d’IX, va como númberu 2, siendo’l 3 pa Rosa María Espiño, tamién de Podemos.

Tamién repite’l diputáu  José Ignacio Prendes como cabezaleru de Ciudadanos-Partido de la Ciudadanía (12,63 por cientu). El númberu 2 de la llista ye Pedro Herrero.

Pela so parte, Andecha Astur, únicu partíu asturianu que se presenta en solitariu, acude con Llucía Fernández Marqués como candidata depués de recoyer 10.000 firmes “pola República Asturiana”. La Llei Eleutoral eleutoral actual obliga a presentar la robla de 1.000 persones censaes n’Asturies pa poder acudir a les Estatales a les formaciones ensin representación, midida mui criticada pol partú nacionalista, que decidió responder recoyendo diez vegaes más.

El restu de candidatures y candidatos son les siguientes: Partido Animalista Contra el Maltrato Animal (PACMA), con Claudia Suárez Martínez; PCTE, con Raúl Martínez Turrero; VOX, con José María Figaredo; PUM+J, con Alberto Bueno; Actúa, con Ángel José López Díaz; y Recortes Cero-Grupo Verde, con María de las Mercedes de la Torre.

Candidatos pal Senáu

Nel casu del Senáu, onde a Asturies correspuenden-y 4 senadores vía eleiciones, de les que 3 anguaño son del PP-Foro y 1 del PSOE, preséntense les mesmos partíos a esceición d’Actúa. Na coalición ente populares y forista van como candidatos José Ramón García Cañal y José Manuel Rodríguez González, siendo’l númberu 3 pa Foro, que lleva a María del Camino Gutiérrez Gutiérrez.

Pol PSOE’l cabezaleru ye Francisco Antonio Blanco, con María Fernández Álvarez y Fernando Lastra como siguientes na llista. El restu de candidatures y candidatos son los siguientes: Unidas Podemos, con María Mar García González; Ciudadanos, con Nicanor García Fernández; Andecha Astur, con Arturu Xosé Bermeyu; PACMA, con Walter Sánchez Suárez; PCTE, con Saúl Fernández Garrote; VOX, con Juan Fernández Baños; Partido Humanista, con Jesús Fernando Rodríguez Roiz; PUM+J, con Agustín Garrido; y Recortes Cero-Grupo Verde, con Eduardo Madroñal.