Asturies entera na rede

Anque entovía ta en fase de prebes y nun funciona al 100%, dende Asturies.com nun podemos dexar de dar anuncia a los nuestros llectores d'una de les novedaes que tan cociendo nel web oficial del Principáu como ye la cartografía d'Asturies entera a escala 1:5000. El Sistema de Información Territorial del Principáu d'Asturies (SITPA), empobináu dende la Conseyería d'Infraestructures y Política Territorial, en collaboración cola Dirección Xeneral d'Organización y Sistemes de la Información, ye'l responsable d'esta páxina, que, de la qu'eche a andar, va convertise de xuro nuna de les estayes más visitaes del web institucional del Principáu. De momentu los marcos de les páxines nun concueyen como debieren los unos colos otros, y anque hai coses de visualización que nun tan tolo trabayaes que debieren, nun dexa de ser una ferramienta de lo más útil poder disponer na rede d'unos mapes tan completos y interactivos, yá que la versión definitiva dexará al internauta escoyer si quier visualizar o non elementos del mapa como les carreteres, les llínies altimétriques, llendes de conceyos etc. El sitiu web complétase con otros mapes específicos como'l mapa de suelu industrial, el de Recursos Sociales d'Asturies o el de carreteres, quiciás el que más consultes tenga.La cadarma pa facer esta xera xeográfica de tan grande interés sacose del Mapa Topográficu d'Asturies, que se fizo d'alcuerdu a la información apurrida por una campaña de vuelos fotogramétricos ente los años 94 y 96, polo que dende'l SITPA alvierten que la validez d'esti mapa dependerá de la velocidá de les actividaes tresformadores del paisaxe.