Asturies enllénase de xestos pa condergar les violencies machistes

Esti miércoles, 25-P, ye'l Día Internacional de Desaniciu de la Violencia contra la Muyer.

El malva, acompañáu del prietu, tomó les cais d'Asturies dende esta mañana pa recordar el problema entá vixente de les violencies machistes. El llamamientu pa poner llazos d'esti collor fixo que se pudieran ver en ventanes, portales y coches –ente ellos tolos taxis d'Avilés–, ente otros munchos llugares, y son numberoses les persones que los utilizaron pa decoraron les sos prendes negres cola fin de visibilizar esta llucha.

La Xunta Xeneral tamién se suma a esta xornada, con lluces que tamién se repiten en cases conceyu del país xunto con decoraciones malves, y Adrián Barbón fixo una declaración institucional. "Les condiciones especiales nos que nos obliga vivir la crisis sanitaria impídenos salir a la cai. Pero convídovos a vistir Asturies de moráu" y "combatir esi inventariu del horror que son les violencies contra la muyer. Nesa llucha siguiremos, hasta que nun haya nin una vida menos, nin una muerta más", señaló'l socialista, que recordó a Lorena Dacuña y Susana Criado, asturianes asesinaes esti añu.

Naciones Xuníes vien conmemorando esta xornada dende'l 1981, que recuerda l'asesinatu de trés hermanes, les Mirabal, activistes polítiques, en República Dominicana nel 1960 pol réxime de Trujillo. Esti añu esta organización afonda en 'La pandemia na solombra: violencia contra les muyeres nel confinamientu'.

Actividá en La Llegra

Son munches les actividaes programaes esti día, con llectura de manifiestos en delles poblaciones del país. Ente elles ta una ponencia en llinia qu'entama'l Llar La Llegra a les 19.30 hores, na que Claribel, líder llabradora colombiana refuxada n'Asturies, va falar de 'Muyeres campesines en Colombia: ente la escluxón como pandemia y la violencia impune'.

Na semeya, la Xunta Xeneral iluminada de color malva, actu simbólicu que va repetise güei.