Asturies en FITUR

Asturies asume en Fitur la coordinación de los llabores de promoción de la marca España Verde, qu'integren les comunidaes de la cornisa cantábrica. El plan nuevu d'acciones va incluyir la creación d'una páxina web, perfiles en redes sociales y iniciatives para fomentar la llegada de turistes de Reinu Xuníu, Francia, Portugal, Italia y Alemaña.

La marca España Verde, impulsada pole.s cuatro comunidaes de la cornisa cantábrica: Galicia, Cantabria, País Vascu y Asturies, va promocionase pela primer vez nos mercaos asiáticu y estadounidense anguaño. Asina lo avanzó güei en Fitur el conseyeru d'Empléu, Industria y Turismu, Isaac Pola, mientres la presentación del plan d'acciones de promoción turística qu'estes cuatro autonomíes van desenvolver de forma conxunta. Amás, mientres l'actu, el Principáu tomó'l testigu de la coordinación de la marca.

España Verde va poner en marcha una estratexa nueva de promoción que pretende reforciar la mesma marca y aportar a mercaos internacionales nuevos.

El plan, con un presupuestu inicial de 200.000 euros financiáu a partes iguales poles cuatro comunidaes, va incluyir, ente otres midíes, un programa d'espansión dixital, cola creación d'un portal propiu n'internet y perfiles en redes sociales. Asina mesmo, van impulsase productos comunes como'l surf, la gastronomía, el Camín de Santiago o bodegues, llagares y palacios. Amás van caltenese les llinies de promoción empobinaes a operadores turísticos y profesionales de medios de comunicación.

Una de les novedaes principales va ser l'acercamientu a mercaos internacionales nuevos en collaboración con Turespaña. “Vamos siguir trabayando en dalgunos yá tradicionales y maduros, como Reinu Xuníu, Francia, Portugal, Italia y Alemaña, y tamién vamos enfusar, pela primer vez, en mercaos como Estaos Xuníos, Xapón y Corea del Sur, estos dos últimos países, grandes potencies económiques del estremu oriente”, esplicó Isaac Pola.

El conseyeru sorrayó que'l programa d'acciones pretende, en definitiva, “qu'España Verde pase de ser un ámbitu de collaboración a una marca cola so propia identidá”. “Por ello, que correspuenda a Asturies la coordinación nesti añu que plantegamos como una renacencia de la marca, ye tou un arguyu”, añedió'l titular d'Empléu.

Tamién participaron nel actu representantes del Ministeriu d'Enerxía, Turismu y Axenda Dixital, de les comunidaes autónomes de Galicia, Cantabria y País Vascu, y el director xeneral de Comerciu y Turismu del Principáu, Julio González Zapico.

Presentación de novedaes turístiques

El conseyeru participó güei en Fitur n'otres actividaes desenvueltes nel estand del Principáu, como la presentación de Mines d'Asturies, un productu impulsáu polos conceyos de Samartín del Rei Aurelio y Llangréu xunto con Hunosa que supón “dar un pasu más na promoción cultural y turística del patrimoniu industrial”, resaltó Pola.

El titular de Turismu destacó, asina mesmo, la iniciativa Pelegrinos pel Norte: d'hotel n'hotel. Esti productu, impulsáu nos sos oríxenes pola Unión Hotelera —anguaño integrada n’Otea—, representa “unu de los productos más completos y apetecedores pa cualquier pelegrín, yá que ufierta una serie de servicios asociaos al Camín de Santiago a quien s'agospien nos distintos hoteles que s'atopen tanto na ruta de la mariña como na primitiva”.

Otra manera, l’estand d'Asturies nel certame acoyó tamién la entrega del Premiu Nacional d'Aire Llibre al Meyor Productu de Turismu Activu. L'asociación asturiana Cudillero Empresas Turísticas Asociadas (Ceta) recibió'l galardón pol so proyectu Estaciones gastronómicas, que consiste na celebración de cuatro eventos al añu venceyaos a productos locales de temporada: merluza, pulpu, faba y calamar, cola mira d'incentivar el gastu turísticu en temporada baxa. Al actu asistió'l director xeneral de Comerciu y Turismu.