Asturies dio emoción en hockey

El del fútbol nun foi l'únicu acontecimientu deportivu del fin de selmana, y ye que la selección asturiana de Hockey sobre patines tamién aprovechó estes navidaes pa facer la so presentación absoluta, en cuantes que yera'l primer partíu de la historia qu'una selección de xugadores asturianos d'esti deporte xugaben un partíu contra rival d'otru país. Marcáu pol homenaxe a los antiguos xugadores del Cibeles que nos 80 marcaron el meyor tiempu del hockey astur, rl debú nun foi fácil, y ye qu'enfrente taba ná menos que'l meyor equipu del mundu, Portugal, que salía de favoritu.

Con too y con ello los asturianos demostraron que nun yeren mancos, y l'equipu del país foi el primeru n'adelantase nel marcador, llevando la delantera en tol xuegu hasta que, yá bien metía la segunda parte, Portugal apretó y, tres de dos ventayes asturianes, marcó la primer vantaya lusa col 2-3. Paecía que nun quedaba alternativa que doblar la rodilla, pero namás sacar del centru del campu Toño Mier volvió a empatar. Énte más de 3.000 persones que vivieron con emoción l'espectacular xuegu de dambos equipos, Asturies pudo ganar nun penalty a poco del final, pero mientres Tony Sánchez falló la pena másima, Ricardo Pereira nun dexó que se-y esmuciere l'últimu cartuchu pa Portugal, anotando'l 3-4 final.

Contador Estadistiques