Asturies difunde en Valladolid los sos trés patrimonios mundiales

Participa per primer vegada na biañal AR&PA col arte rupestre paleolíticu, el Prerrománicu y el Camín de Santiago como activos.

El stand d'Asturies ta dedicáu a la xestión del patrimoniu mundial del país, esto ye, l’arte rupestre paleolíticu, el Prerrománicu y el Camín de Santiago. Nél espón la xestión integral que se realiza d’estos bienes patrimoniales dende la Direición Xeneral de Patrimoniu Cultural y, al traviés de la documentación gráfico que s’amuesa, el visitante pue algamar una visión global de les polítiques de caltenimientu, restauración, rehabilitación, investigación y divulgación que se vienen desenvolviendo nestos ámbitos patrimoniales.

Les empreses asturianes Dogram, Fundación CTIC, GEA Asesoría Geológica y Foto Asturias, que realicen proyeutos d’investigación y innovación nel ámbitu patrimonial y que collaboren col Gobiernu nesta materia, tamién tienen el so espaciu dientro'l stand. D'esta forma, sofítase a la iniciativa empresarial del nuesu país nesti campu pa la so proyeición internacional.

Ente los conteníos que destaquen del espaciu asturianu na Bienal de la Restauración y Gestión del Patrimonio tán dellos proyeutos innovadores, como una inmersión pente medies de la realidá virtual na fonte de Foncalada (patrimoniu prerrománicu) o un visualizador interactivu de pieces arqueolóxiques. Esta feria celébrase dende ayeri y hasta'l domingu nel Centro de Congresos Miguel Delibes de Valladolid n'horariu de 11 a 20 hores.

Visita del presidente de Castilla y Lleón

Juan Vicente Herrera, presidente de Castilla y Lleón, visitó'l stand d'Asturies na xornada inaugural de la Biañal AR&PA, que recibió de manes de Vicente Domínguez, viceconseyeru de Cultura y Deporte, una monografía espublizada por Patrimoniu Cultural sobre la cueva de Sidrón y una reproducción fecha con impresión 3D d’un colgante decoráu magdaleniense de la cueva asturiana de Les Caldes. El popular, un gran conocedor del Camín de Santiago de la so comunidá, manifestó’l so interés por percorrer les rutes xacobees que trescuerren per Asturies.