Asturies demanda xunto con otros territorios una estratexa d'estáu contra la despoblación

Tamién la busca d'alliances n'Europa.

El Foru de Comunidaes Pol Cambiu Demográficu, na qu'amás d'Asturies participen Cantabria, Galicia, Castilla y Lleón, Castilla-La Mancha, Extremadura, La Rioja y Aragón, aconceyó ayeri en Santiago de Compostela, reunión na que s'aprobó reclamar al futuru Gobiernu d'España que diseñe una estratexa d'estáu y la busca d'alliances na Xunión Europea pa lluchar contra la despoblación. La representación asturiana corrió a cargu de Guillermu Martínez, conseyeru de Presidencia y Participación Ciudadana.

El grupu interautonómicu, que tamién cuntó cola presencia del presidente de la Xunta de Galicia, Alberto Núñez Feijóo, defendió la necesidá d'articular polítiques sectoriales prioritaries pa la incorporación de la perspectiva demográfica n'ámbitos como l'atención a la dependencia; el sofitu a les families; la conciliación y racionalización d'horarios; les oportunidaes llaborales pa la mocedá y les estratexes pa la retención del talentu; el sistema de pensiones; l'aprovechamientu de les oportunidaes del mediu rural pal desenvolvimientu de proyeutos d’emprendimientu y autoemplegu; la reivindicación del sector primariu; y la conexón de los centros educativos cola so redolada. Amás, y a escala europea, propunxo un alcuentru colos representantes nuevos de la Comisión y Parllamentu Européu, y impulsar un grupu de presión sofitáu na Rede Europea de Rexones con Desafíos Demográficos (DCRN).

Prevése que'l plenu del Comité de les Rexones de la Xunión Europea encare los próximos díes 15 y 16 de un dictame debatíu primeramente na DCRN que, ente otres cuestiones, pide a la Comisión Europea que s'aproveche'l marcu financieru plurianual posterior al 2020 pa dar un puxu decidíu al desafíu demográficu, considerando la situación y evolución de la población de los territorios y ciudaes nel diseñu de preseos nuevos y na toma de decisiones polítiques.

Una prioridá pal Gobiernu

Martínez señaló tres l'alcuentru que "les polítiques contra la cayida de población son una prioridá pal Gobiernu d'Asturies, como lo demuestra la creación d'esti foru y el pautu demográficu nel que la Conseyería de Presidencia y Participación Ciudadana vien trabayando pa buscar alternatives a esti desafíu. Al amparu del pactu, van movilizase recursos de toles árees del Principáu pa impulsar un alcuerdu social y políticu que dexe ufiertar una respuesta global a esti retu coleutivu".

Otra manera, nel alcuentru Asturies presentó al restu de territorios el so programa 'Más qu'un respiru', una iniciativa que favorez la conciliación de la vida llaboral y familiar de les muyeres rurales, xenera oportunidaes nueves d'emplegu, emprendimientu y participación social, y fixa población nel territoriu.