Asturies, convidada al Conseyu de Llingües

Antón García participó de manera telemática nel aconceyamientu, al que'l Gobiernu estatal tamién invitó a Aragón y Castilla y Lleón.

El Conseyu de Llingües Cooficiales tuvo llugar estar tarde cola asistencia tamién per primer vegada de representantes d'aquellos territorios con idiomes non oficiales. Ye un órganu colexáu d'análisis, impulsu y coordinación téunica ente los ministerios en rellación col usu de les llingües na Alministración estatal.

Presidida pol secretariu d'Estáu de Política Territorial y Función Pública, Víctor Francos, nella participen los responsables de Política Llingüística de Galicia, Euskadi, Navarra, Catalunya, Comunitat Valenciana y Illes Baleares, amás de la secretaria xeneral de Coordinación Territorial, Miryam Álvarez. Nesta ocasión acompañáronlos tamién los d'otros territorios con llingua propia non oficial, como Aragón, Castilla y Lleón, y Asturies, con García como representante.

Nel aconceyamientu'l ministeriu informó de les actuaciones feches en cumplimiento de los alcuerdos del alcuentru anterior, celebráu n'avientu, como la designación d'una persona en cada ministeriu pa promover y impulsar el cumplimientu de les obligaciones en materia de llingües. Tamién toles aiciones desendolcaes na formación del so personal en sensibilización sobre normativa vixente sobre llingües y en ferramientes informátiques de traducción automática.