Asturies celebra’l Día de les Lletres Asturianes

|
Cartelu na cai del XXXIX Día de les Lletres Asturianes

La ciudadanía va salir otra vuelta a la cai pa celebrar la gran fiesta de la nuesa lliteratura y reivindicar la oficialidá del asturianu y del gallego-asturiano. Esti vienres ye’l XXXIX Día de les Lletres Asturianes, nel que l’Academia de la Llingua Asturiana recibe a dos académiques nueves na so xunta estraordinaria nel Campoamor.

Margarita Fernández Mier, historiadora y profesora de la Universidá d’Uviéu na Facultá de Filosofía y Lletres, y Isabel Hevia, tamién profesora de la institución universitaria na Facultá de Formación del Profesoráu y Educación, pedagoga y socióloga, van recibir esti honor nun actu previstu pa les 20.30 hores nel uvieín Teatru Campoamor. Va ser un actu especial tamién por ser el primeru de Xosé Antón González Riaño como presidente tres sustituyir nel cargu a Ana María Cano, siendo mui esperáu’l conteníu del so primer discursu institucional.

Sonia Avellaneda y Próspero Morán encárguense un añu más de la presentación del actu, que va contar con un entamu musical a cargu del gaiteru Fabián Fernández y, tres la intervención de González Riaño, una llectura de poemes del númberu 34 de la revista ‘Lliteratura’. El pieslle del actu académicu pol Día de les Lletres Asturianes va tener como protagonista a Nacho Vegas, que va ufrir un pequeñu conciertu xunto col Coru Al Altu la Lleva nel que va facer un percorríu pel so reportoriu de música asturiana y n’asturianu.

‘L’asturianu llingua oficial ¡yá!’

Una hora enantes, de la Estación del Norte (RENFE), va salir la manifestación qu’entama tolos años la Xunta pola Defensa de la Llingua Asturiana (XDLA) nel Día de les Lletres Asturianes baxo’l lema ‘L’asturianu llingua oficial ¡yá!’. Esta convocatoria llega catorce díes depués de la gran marcha per Uviéu pola oficialidá qu’axuntó a miles de persones, 30.000 según la organización.

La XDLA “fai un llamáu a tolos asturianos y a toles asturianes pa que, como vienen faciendo dende hai 32 años, muestren el so apoyu a la igualdá de derechos llingüísticos ente tolos asturianos y a un futuru dignu pal nuestru patrimoniu llingüísticu”. Nella van participar una bona cantidá d’organizaciones polítiques, sindicatos y coleutivos, ente ellos Iniciativa pol Asturianu, que va axuntar baxo una mesma pancarta col lema ‘Oficialidá, el camín constitucional de futuru pal asturianu’ a representantes y militantes de los cuatro partíos presentes na Xunta Xeneral favoratibles al asturianu, esto ye, la FSA, Podemos, Izquierda Xunida y Foro.

Día del Llibru n’Asturianu

La Conseyería d’Educación y Cultura tamién entama actividaes esta xornada dientro de la programación de la XXXIX Selmana de les Lletres Asturianes. Ente ellos destaca’l Día del Llibru n’Asturianu, cola collaboración de mediu centenar de llibreríes, qu’ufre un 10 por cientu de descuentu na merca de llibros y discos n’asturianu, amás de recibir de baldre la edición nesa llingua del llibru conmemorativu d’esta edición ‘Cúntame un cuentu’ o ‘Cúntame un conto’.

Les llibreríes y tiendes participantes son: Aldebarán, Antares, Cervantes, Chemi, El Corte Inglés, Diocesana, Elías, Esfera, Garluc, Maribel, La Palma, Polledo, Puntos, Reconquista, Reconquista II, San Pablo, II Milenio y Trabe (en llinia), n'Uviéu; Acuarel, Bardos, De Bolsillo, La Buena Letra, Central, El Corte Inglés, 4 Letras, Paradiso, Roy y Mundo Sonoro, en Xixón; Casona, Centru Niemeyer, Clarín, El Corte Inglés, Víctor Núñez, Elepé Productions y la Feria del Llibru y Discu n'Asturianu, n'Avilés; Disco 55, La Pilarica, La Torre y La Llocura, en Mieres; Pablo, en Bual; Treito, en Cangas del Narcea; Imagen, en Cangues d'Onís; Alfonso, n'A Caridá; Muséu de la Sidra, en Nava; Gestión, en Les Arriondes; Rima, en L'Infiestu; Sol, en L'Entregu; Eroski y FNAC, en Paredes; Naredo, en La Pola Siero; y Casa Pérez, Patefa, y San Pedro, n'A Veiga.

Otra manera, l’IES Víctor García de la Concha de Villaviciosa ye l’escenariu del actu escolar institucional de celebración la Selmana de les Lletres, nel que s’entreguen dende’l meudía los premios de los certámenes artísticu y lliterariu. Yá de nueche, a les 22 hores, nel Teatru El Llar, en Les Vegues, va representase la obra ‘Crisis y otres histories’, con testu d’Adolfo Camilio Díaz, que van poner escena los participantes nos Talleres de Teatru p’Adultos de Corvera.

Contador Estadistiques