Asturies celebra'l Día de la Llingua Materna con un llamáu unámime a la tresmisión del idioma

|
Día Internacional de la Llingua Materna 2020

“Ta franciendo y ye imprescindible qu'aseguremos el relevu y que los neños y neñes tengan posibilidaes reales de socializase n'asturianu a tolos niveles”, recuerda ‘Reciella. Families pol Asturianu’ aprovechando’l Día Internacional de la Llingua Materna. Félix Fernández Rodríguez, d’Acuto Xuegos, calca na necesidá de que “sían conscientes” de qu’empleguen l’idioma.

"Dende Reciella esti 21 de febreru recuérdase la importancia que tien la tresmisión interxeneracional de la llingua pa caltener la vitalidá d'un idioma", apunta esti coleutivu formaú por families esmolecíes n'asegurar el relevu del asturianu a lo más pequeño.

En tol mundu recuérdase la xornada na que trés mozos morrieron en Bangladesh nel 1952 polos disparos del exércitu paquistaní –qu’ocupaba’l país– nuna manifestación en Dhaka pola defensa de la llingua bengalí, fecha que la Organización de les Naciones Xuníes pa la Educación, la Ciencia y la Cultura (UNESCO, poles sos sigles n’inglés) escoyó pa recordar la importancia de preservar toles llingües al ser éstes un patrimoniu común de la humanidá.

“Dende la organización constátase que cada vuelta ta más claro qu'hai que dedica-y una parte perimportante del esfuerciu de la normalización llingüística a aspectu ya qu'hasta agora diose-yos abonda más importancia a otres cuestiones como la enseñanza fuera del entornu familiar, que si nun van acompañaes del refuerzu de la tresmisión ente xeneraciones y el refuerzu del asturianu como llingua vehicular, nun son efectives a mediu y llargu plazu”, sigue apuntando Reciella. Nesi sen, encamienta al Gobiernu pa que la so política llingüística “garre esi enfoque”, siendo consciente de que “la tresnmisión interxeneracional del asturianu ta franciendo y ye imprescindible qu'aseguremos el relevu y que los neños y neñes tengan posibilidaes reales de socializase n'asturianu a tolos niveles”.

Acuto Xuegos ye una empresa familiar que nació al decatase de falta d’opciones ente les neñes y neños pa rellacionase al traviés del xuegu n’asturianu. Asina, l’añu pasáu asoleyó cuatro xuegos n’asturianu y otru en gallego-asturiano, de los que dos tán escosaos, apostando tamién esti añu pa los divertimentos de mesa p’adultos con ‘¿Cuála ye?’, una especie de ‘Trivial Pursuit’, qu’en 3 díes de campaña de micromecenalgu lleva recaudaos 3.696 euros, el 82 por cientu del oxetivu.

“La tresmisión interxenaracional del idioma ye fundamental y los neños pasen la mayor parte del tiempu xugando, polo que vimos necesario ellaborar xuegos n’asturianu que sirvieran pa normalizar la llingua”, rellata Fernández Rodríguez, qu’incide nuna cuestión que considera clave: “Ye importante que los neños sían conscientes de que tán xugando n’asturianu”.

Actividaes en tol país

Mientres tola selmana los centros educativos del país tán entamando actividaes con motivu de la Día Internacional de la Llingua Asturiana. Tamién el Gobiernu, que programó ayeri en Mieres la representación de ‘Les rellaciones peligroses’, de Factoría Norte, III Premiu y Festival Nel Amaro de Teatru Profesional n’Asturianu y Gallego-asturiano, pa les escolines y escolinos del conceyu.

Tamién organícense eventos enfocaos a un públicu adultu esti 21 de febreru. Asina, en Villaviciosa va entregase’l III Concursu de relatos curtios 'Xosé Caveda y Nava', que nesta ocasión ganó Francisco ‘Paco’ Álvarez con 'El Faru de Viena’, a les 18.30 hores na Casona de los Hevia, actu nel que var presente l’alcalde Alejandro Vega y que se va completar cola presentación del númberu nuevu de la revista ‘Friuz’ qu’edita El Ronchel, y cola actuación musical del duu avilesín Filanda.

 

Contador Estadistiques