Asturies celebra San Xuan cola tradicional quema de fogueres y l'engalanamientu de fontes

Cientes de fogueres van prender n’Asturies esta medianueche pa celebrar San Xuan. La nueche más máxica del añu va trayer un abanicu grande d’opciones per tol país pa disfutar d’una de les cites más esperaes del añu polos asturianos.

 

La mayoría de ciudaes y pueblos –al igual que munchos munchos barrios– del país tienen preparaes pa esta nueche fogueres pa celebrar el solsticiu de branu –realmente foi’l día 20, pero la Ilesia católica treslladó esta celebración pagana pa coincir con San Xuan Bautista– y quemar los augurios malos. Esta tradición de raigaños celtes que recibía’l nome d’Alban Heruin y na que se fai cultu al sol y al agua al traviés del engalanamientu de fontes, ta entovía ta mui viva n’Asturies. Amás ye l’únicu momentu d’atopar la flor d’agua, que sal per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.

 

La foguera más multitudinaria ye la qu’entama’l Conceyu de Xixón na sablera d’El Natahoyo, qu’esti añu va contar cola presencia de Felpeyu y Xera. Los primeros van actuar a les 23.15 hores, mentes que’l grupu de folk-electrónicu va facelo tres el prendíu de la foguera y el llanzamiento fueos artificiales, alredor de les 00.20 hores. Otros barrios de la ciudá, como Ciares o La Calzada en L’Arbeyal, tamién celebren esta nueche máxica nun ambiente más vecinal.

 

Una cita con gran tradición ye de la Corvera, en Tresona, na que repiten Dixebra, un clásicu nesta fiesta. La folixa va principiar a les 21.30 hores con un pase de la orquesta Vivians, pa depués ceder el protagonismu a la Banda Gaites de Corvera (23 hores). A les 23.40 hores va tener llugar l’espectáculu ‘Xanes’ de Producciones Nun Tris, pa proceder al prendíu d’una foguera especial a medianueche y continuar cola actuación de la banda referente del rock n’asturianu. Un pase nuevu de Vivians y música electrónica van pesllar la nomada ‘Foguera d’Asturies’.

 

Na cuenca del Nalón hai celebraciones especiales en L’Entregu y La Felguera. El Centru Social Autoxestionáu La Semiente entamar por tercer añu nel prau xuntu al campu de fútbol del Nuevu Nalón una folixa solidaria que principiar pela mañana col engalanamientu de les fontes del pueblu y d’otros puntos del conceyu. A les 20 hores van abrise les cantines del  prau, onde van vendese bébores comercializaes en llingua asturiana, como la cerveza Caleya y la sidra L’Allume, cola intención de facer más curtia la espera de la llegada d’una comitiva de cabezudos y gaiteros, prevista pa les 22.30 hores. La batucada Matu na Cai animará los momentos previos al prendíu y la fiesta allargaráse hasta bien entrada la madrugada con más música y una queimada popular. Dende La Semiente anuncien que tolos beneficios algamaos van destinase a la merca de material escolar pa les families necesitaes. Pela so parte, la foguera llangreana va contar cola actuación de Nuberu a partir de les 22 hores nel parque Pinín.