Asturies celebra oficialmente’l día contra la homofobia

El coordinador de l'Asociación Xente Gai Astur (XEGA), José Manuel González, dio ayeri una rueda de prensa conxunta col Conseyeru de Xusticia Javier Valledor pa presentar los conteníos d'esti día internacional que va celebrase n'Asturies por primer ocasión.

El Día contra la Homofobia nació a primeros d'esta década en dellos países nos que los homosexuales nun tienen reconocíos derechos civiles. Asina, el Día Mundial escontra la Homofobia y la Tresfobia trata de combatir y denunciar la situación que se da n'ochenta países nos que les relaciones homosexuales son delitu, llegando nueve d'ellos a castigales cola muerte. Según declaró'l representantre de Xega, incluso n'Asturies siguen dándose casos de zurres a homosexuales o espulsiones de locales que nun consinten coles espresiones pñúbliques afectives d'esti colectivu.

Una de les iniciatives de la conmemoración va ser una declaración institucional de la Xunta Xeneral del Principáu que nun ta asegurada al esistir rocea por parte del Grupu Popular. Nel actu José Manuel González echó pelo qu'elli denominó "clero talibán" que s'opón al matrimoniu homosexual y al Partíu Popular que, según González, tien ente los sos oxetivos la defensa de los sectores más homófobos de la sociedá.

El conseyeru de Xusticia, Francisco Javier García Valledor, presentó la celebración d'esti Día contra la Homofobia como "una reivindicación de la plenitú de los derechos civiles" afondando na idea de que la refuga social a los homosexuales respuende a "integrismos que ye preciso desaniciar".
Entrar al web especial de XEGA con motivu d'esti día