Asturies celebra la XXXII Selmana de les Lletres Asturianes

Esti martes van principiar les actividaes de la XXXII Selmana de les Lletres Asturianes con una gala nel Teatru Nuevu de La Felguera. Nesta ocasión la celebración ta dedicada al escritor Manuel d’Andrés Fernández ‘Mánfer de la Llera’ (1918-2005).
 
Dende güei, y hasta’l sábadu, van ser dellos los actos que van desarrollase de manera principal en Llangréu pa recordar a Mánfer de la Llera, pa de Ramón d’Andrés –profesor de Filoloxía na Universidá d’Uviéu y presidente actual de la Fundación Caveda y Nava– y ún de los autores más prestixosos de la nuesa lliteratura. Asina, esta tarde nel Teatru Nuevu de La Felguera, va celebrase, a partir de las 19.30 hores, una gala que va contar con música, teatru y poesíes de Mánfer de la Llera. Pa esta cita ta prevista una actuación d’Anabel Santiago, asina como una llectura de Marisa Vallejo y la representación de la pieza escénica ‘Cultural Popular’ de Dolfo Camilo Díaz, na que van participar Begoña Quirós, José Ramón Oliva y Xuaco Carballido.
 
Mentes, mañana, va celebrase la llectura pública institucional de testos n’asturianu, ún de les poques veces que pue vese a a los políticos de la Xunta Xeneral falando na llingua del país. Ésta va tener llugar nel Salón Europa a les 13 hores. Yá pa pela tarde, la música garra protagonismu col conciertu ‘13 x Mánfer’, que vien acompañáu d’un discu nel que 13 artistes y bandes asturianes faen un homenaxe al escritor convirtiendo dalgunos de los sos poemas en cantares. Pa l’actuación, que va acoyer el Teatru Nuevu de La Felguera a partir de les 20 hores, ta prevista la presencia de Alfredo González, Felpeyu, Hermanos Valle Roso, Mario Fueyo ‘Dark la eMe’, Renacencia, Toli Morilla, Xera, Silvino Torre y l’alumnáu y docentes del IES Cuenca del Nalón. Amás, participen nel discu Sergio Rodríguez, Anabel Santiago, Xabel, Xel Pereda, Herbamora y Dixebra.
 
El xueves, Ciañu incorpórase a los actos de la Selmana de les Lletres cola presentación, na Casa de los Alberti, de la edición conmemorativa ‘Mánfer de la Llera, de la rampla a la pluma’, un volume ilustráu al rodiu del escritor y de la so época; y del llibru ‘En cata de la mio lluna. Antoloxía lliteraria’, de Mánfer de la Llera. Esta actividá va celebrase a les 13 hores, mentes que pela tarde tán programaos dos eventos a les 20 hores. Asina, na Casa la Cultura de Sama, l’asturianada y los monólogos van ser protagonistes n’homenaxe a Manuel d’Andrés Fernández con José Manuel Reguero ‘El Maestru’, Valentín Fuente, Juan Pablo Santos, Manolo Collado, Bibiana Sánchez y Carlos Ronderos. Mentes, na capiella de los Dolores, en Grau, va celebrase un recital poéticu nel que van participar Xuan Xosé Sánchez Vicente, Xuan Bello y Ana Vanessa Gutiérrez, actividá na que collabora la Fundación Aula de les Metáfores.
 
El Día de les Lletres Asturianes va celebrase, como ye vezu, el vienres col actu académicu previstu pa les 20.30 hores nel Teatru Campoamor. Enantes, pela mañana, a les 11 hores, va descubrise una placa dedicada a Mánfer de la Llera na cai de Llangréu que lleva’l so nome, asitiada nel barriu de La Llera, en Sama. Los escolinos y escolines tamién va participar nel homenaxe con un actu que va celebrase nel IES Cuenca del Nalón al meudía. Nél van entregase los premios del XVI Concursu de Poesía y Dibuxu y el VIII Concursu de Cartelismu, y el grupu Duerna va ufrir un conciertu. Yá de tarde, la Xunta pola Defensa de la Llingua Asturiana tien convocada una manifestación (19.30 hores, Estación del Norte) que va percorrer les casi d’Uviéu col lema ‘L’asturianu, llingua oficial’.
 
Por último, la RPA va emitir una programa especial el sábadu pa zarrar les actividaes d’esta Selmana de les Lletres. Ésti lleva’l nome de ‘Mánfer de la Llera, una ponte al Surdimientu’ y va salir n’antena a les 14 hores.