Asturies celebra esti martes el Día Mundial del Agua

|

Esti martes, 22 de marzu, ye’l Día Mundial del Agua, una fecha que busca concienciar a la población sobre la importancia d’una bona xestión del agua. Nel país celébranse delles actividaes, n’especial ente escolinos, pa espardir esti mensaxe.
 
La Organización de les Naciones Xuníes pa la Educación, la Ciencia y la Cultura (UNESCO, poles sos sigles n’inglés) ye la impulsora d’esta xornada que nesti 2011 tien como tema central ‘Agua pa les ciudaes: respondiendo al desafíu urbanu'. El so oxetivu ye “centrar l’atención internacional sobre l’impactu del crecimientu rápidu de la población urbana, la industrialización y la incertidume causada pol cambiu climáticu, los conflictos y los desastres naturales sobre los sistemes urbanos d’abastecimientu d’ agua”, amás de “poner de relieve y afalar a los gobiernos, les organizaciones, comunidaes y persones a participar de forma activa pa responder al desafíu de la xestión del agua urbano”.
 
N’Asturies tan preparaes pa esta xornada delles actividaes orientaes pa escolinos y escolines. Asina, el Conceyu de Xixón organizó dos obres de teatru, ‘El teatro del agua’ y ‘La aventura del agua’, que van disfrutar 800 alumnos d’Infantil y Primaria de dellos centros de la ciudá. Mentes, n’Uviéu, Aqualia organiza un concursu de dibuxu p’alumnos de terceru y cuartu de Primaria que tien el lema ‘L’agua, el luxu más tresparente’. En tolos colexos del país, los maestros preparen actividaes pa concienciar a los más pequeños de la importancia d’esti bien.
 
Los coleutivos ecoloxistes tampoco quieren desaprovechar esta xornada que se vien celebrando dende 1993. La Coordinadora Ecoloxista d’Asturies quinxo recordar, al traviés d’un comunicáu, los problemes asociaos que tien esti recursu n’Asturies, como que “gran parte de les agües residuales tean vertiéndose ensin nengún tratamientu o con un tratamientu insuficiente, col consiguiente impautu nel mediu natural”. D’igual forma, denuncia qu’hai “importantes núcleos y complexos industriales ensin tratamientu como son parte de Xixón, gran parte d’Uviéu, marxe derecha de Avilés, Navia, etc.”.
 
La Coordinadora tamién quier recordar, ente otros aspeutos, la situación mala na que s’alcuentra la rede d’agua nel país, que proovoca qu’haya perdes importantes d’agua; l’ausencia d’una tarifa que penalice los grandes consumos; o el desperdiciu que supón que les empreses asturianes utilicen agua potable no sos procesos industriales cuando podríen usar agües de calidá inferior.

Contador Estadistiques